Navigaziun principala

Cuntegn da la pagina

Lev augment da la populaziun en il Grischun

  • Erste Mitteilung
  • Neuen Beitrag einfügen
Ils 31-12-2014 vivevan en il chantun Grischun permanentamain 195 866 abitantas ed abitants, 927 dapli che l'onn precedent. L'augment dependa cunzunt dal dumber da la populaziun estra ch'è crescha vinavant.

Il svilup dals ultims onns cuntinuescha
Il Grischun ha obtegnì er l'onn 2014 dapli populaziun permanenta, la rata da creschientscha da 0,5 pertschient sa mova en il rom dals onns precedents. En cumparegliaziun cun l'augment da la populaziun permanenta en Svizra (1,2 pertschient) è la midada en il Grischun stada modesta er durant l'onn passà. Mo dus chantuns (AI, NW) han obtegnì l'onn 2014 in augment da la populaziun pli pitschen che quel dal Grischun. Las ratas da creschientscha las pli grondas cun mintgamai passa 1,5 pertschient han però cuntanschì ils chantuns Friburg, Genevra, Zug e Vad.

En la maioritad da las regiuns s'augmenta la populaziun
Entaifer il chantun è il svilup stà different – augments pli gronds hai dà cunzunt en las regiuns cun in grond dumber da populaziun Signuradi/Tschintg Vitgs, Grischun dal nord ed Engiadin'ota, entant che l'Engiadina bassa, Tavau e la Surselva han pers populaziun. En las ulteriuras regiuns èn las midadas absolutas stadas pli pitschnas.

Populaziun permanenta per ils 31-12-2014 tenor regiuns sco er midadas procentualas l'onn 2014
- 
Funtauna: Uffizi federal da statistica (STATPOP)

La citad da Cuira ha registrà l'onn 2014 in augment da la populaziun da 0,6 pertschient e dumbrava il di da referenza da nov 34 547 abitantas ed abitants permanents. Da las vischnancas pli grondas cun passa 2000 abitantas ed abitants han gudagnà Zizers, Domat e Landquart il pli grond dumber d'abitantas e d'abitants, Roveredo, Lumnezia ed Arosa han però pers en questa gruppa la pli blera populaziun.

Augment mo tar la populaziun estra
Entant che la populaziun svizra en il Grischun stagnescha dapi onns sin il medem nivel (di da referenza 160 497 persunas), è s'augmentada la populaziun estra permanenta durant l'onn passà puspè per 2,5 pertschient u per 870 persunas, da nov sin 35 389 persunas. Tranter las naziuns ch'èn represchentadas il pli fitg èn s'augmentadas la populaziun portugaisa e taliana per 3,2 resp. schizunt per 3,9 pertschient, entant ch'il dumber d'abitantas ed abitants tudestgs n'è strusch sa midà, sco durant ils ultims onns.
La part da persunas estras vi da l'entira populaziun permanenta en il Grischun importa 18,1 pertschient (Svizra 24,3 pertschient). Entaifer il Grischun sa concentrescha la populaziun estra permanenta cunzunt sin ils centers turistics en Engiadina ed a Tavau, ma er la Mesolcina sco er il Grischun dal nord demussan parts surproporziunalas. Quotas da persunas estras pli pitschnas sa chattan en las regiuns plitost ruralas.

Quota da la populaziun estra permanenta vi da l'entira populaziun permanenta tenor regiuns ils 31-12-2014
- 
 
Funtauna: Uffizi federal da statistica (STATPOP)

Dapli naschientschas e tendenza da parturir pli tard
Il dumber da mortoris è restà en il Grischun l'onn 2014 cun 1704 sin il nivel dals onns precedents.

Percunter han ins pudì registrar durant l'onn da rapport 1803 naschientschas, uschè bleras sco betg pli dapi l'onn 2000. L'augment dependa er qua en emprima lingia da la populaziun estra permanenta, mintga quart novnaschì ha ina naziunalitad estra. Plinavant cuntinuescha la tendenza da parturir pli tard er durant l'onn 2014, passa 30 pertschient da las mammas eran il mument da la naschientscha pli veglias che 35 onns.

L'onn passà han maridà 908 pèrs e 352 èn vegnids divorziads, questas valurs sa movan en il rom da quellas dals onns precedents. Bundant 35 pertschient da tut las lètgs ch'èn vegnidas divorziadas han durà passa 20 onns.

Ils resultats detagliads da las statisticas da la populaziun da tut las vischnancas e da tut las regiuns stattan a disposiziun sin la pagina d'internet da l'uffizi per economia e turissem sut (Statistik und Register).


Infurmaziuns:
Patrick Casanova, manader da la partiziun "statistica e registers", tel. 081 257 23 74, e-mail: Patrick.Casanova@awt.gr.ch


Gremi: uffizi per economia e turissem dal Grischun
Funtauna: rg uffizi per economia e turissem dal Grischun
Neuer Artikel