En sia ultima sesida ha la regenza grischuna prendì posiziun tar la vista cumplessiva da la promoziun dal sport da la confederaziun. En quest connex vegn natiralmain beneventada la realisaziun dal project lantschà en il Grischun davart in center naziunal da sports da naiv a Lai. Ultra da quai ha la regenza deliberà ils meds finanzials per sanar la fatschada sid da la baselgia claustrala da Mustér.
Consultaziun davart la vista cumplessiva da la promoziun dal sport da la confederaziun
La regenza grischuna prenda posiziun tar la vista cumplessiva da la promoziun dal sport da la confederaziun che cuntegna tant in concept per il sport da prestaziun, per il sport da massa sco er in concept d'immobiglias per il sport. Ella sa legra che la gronda impurtanza dal sport per la Svizra vegn renconuschida e beneventa las stentas da la confederaziun da meglierar la promoziun dal sport e da planisar las mesiras correspundentas en moda concepziunala ed a lunga vista. Il sport en general n'ha betg mo ina gronda impurtanza per il turissem e per l'economia, mabain er per ils aspects da la sanadad e dal svilup social.
En la resposta da consultaziun tracta la regenza prioritarmain ils puncts che concernan il concept d'infrastructura ed uschia il center naziunal da sports da naiv (CNSN). La realisaziun d'in CNSN a Lai vegn beneventada senza restricziuns. Tenor il rapport d'evaluaziun da la confederaziun sa chatta il project cleramain sin posiziun 1, en il process d'annunzia voluminus ha el ademplì il meglier las pretensiuns. Plinavant giauda il project il sustegn dal chantun Grischun ch'è pront da subvenziunar il CNSN cun ina contribuziun d'investiziun da 10 milliuns francs. Il bain immobigliar duai ultra da quai vegnir mess a disposiziun da la vischnanca da staziunament gratuitamain en il dretg da construcziun. Plinavant sustegnan er la conferenza da las regenzas dals chantuns da la Svizra orientala ed il chantun Turitg il project da Lai. Tenor l'avis da la regenza avess in CNSN en l'entira Svizra ina gronda attracziun per ils sports da naiv. Retschertgas pli novas han mussà che l'interess dals uffants e dals giuvenils per ils sports da naiv è sa reducì ils ultims onns. En vista a l'impurtanza dal sport d'enviern per il turissem svizzer vegn per exempel il regress dal dumber da champs da sport d'enviern da las scolas designà sco preoccupant. Analogamain als dus centers a Magglingen ed a Tenero che han inizià in svilup positiv particularmain tar las disciplinas da sport da stad duai pervia da quai vegnir creada cun il CNSN ina infrastructura adequata per ils sports da naiv.
En la consultaziun tar il concept d'immobiglias prevesa la confederaziun da priorisar las mesiras ed ils projects, sche quels n'avessan betg da pudair vegnir realisads tuts en vista al svilup da las finanzas federalas. La moda e maniera co che la confederaziun metta las prioritads, refusa la regenza decididamain. Tenor ella duess il CNSN vegnir realisà avant singuls projects d'infrastructura planisads a Magglingen ed a Tenero.
Il concept da sport da massa ha l'intent d'augmentar las activitads da sport e da moviment da tut la populaziun sco er d'intimar da far sport durant l'entira vita. Il sport da massa ha ina impurtanza fitg gronda tar la realisaziun da las finamiras da la promoziun chantunala dal sport. La regenza considerescha las finamiras da "sport per tuts" e da "dapli sport" sco adequatas per quai. Per augmentar las activitads da sport e da moviment da la populaziun e per garantir ina vasta purschida d'activitads da sport e da moviment ha il program da giuventetgna e sport (G+S) ina impurtanza existenziala. G+S è la basa da la promoziun svizra dal sport e sto perquai vegnir rinforzada en mintga cas da la confederaziun.
Er cun il concept da sport da prestaziun e cun sias finamiras è la regenza da princip d'accord. Ella beneventa las mesiras preschentadas da la confederaziun, en spezial quellas per sustegnair e per promover las sportistas ed ils sportists d'elita e lur trenadras e trenaders sco er talas concernent la promoziun dal sport d'elita en l'armada, en il corp da guardias da cunfin, ma er en la protecziun civila ed en il servetsch civil. Il concept da sport da prestaziun identifitgescha ils dretgs regulaturs per promover efficaziamain ils talents: trenadras e trenaders professiunals e scolads bain sco er federaziuns cumpetentas che han avunda resursas. Per quests dus puncts d'acziun vegnan però mess a disposiziun en il concept memia paucas resursas finanzialas.
Restauraziun da la baselgia claustrala da Son Martin a Mustér
Per restaurar la fatschada sid da la baselgia claustrala da Son Martin a Mustér ha la regenza deliberà ina contribuziun chantunala da circa 390 000 francs. La baselgia claustrala da Son Martin è la part centrala dal stabiliment claustral baroc a Mustér. La fatschada sid, ch'è la fatschada principala da la baselgia, è en in stadi desolat. Ella è caracterisada spezialmain d'ina restauraziun da l'onn 1954. Intervenziuns staticas da restauraziuns da pli baud ston vegnir controlladas e renovadas. Il project prevesa da restaurar tut la fatschada inclusiv ils clutgers e da meglierar l'accessibladad tras differentas mesiras vi dals conturns.
Pervia da la periclitaziun vegn il project parzial "Fatschada sid" realisà independentamain da la restauraziun totala da las ulteriuras parts da la baselgia. Igl è previs da far la restauraziun totala a partir da l'onn 2017.
Fatschada sid da la claustra e da la baselgia claustrala da Mustér
Nossadunna cun il mantè protegint vi da la fatschada sid
Gremi: regenza
Funtauna: rg chanzlia chantunala dal Grischun