Navigation

Inhaltsbereich

  • Erste Mitteilung
  • Neuen Beitrag einfügen
Ils chanceliers dals chantuns dal consorzi han decidì da betg sviluppar vinavant il sistem dad e-voting dal consorzi. Il chantun Grischun è però anc adina interessà d'introducir la votaziun electronica sut cundiziuns acceptablas.

Suenter la decisiun negativa dal cussegl federal dals 12 d'avust 2015 han ils chanceliers dals chantuns dal consorzi Vote électronique fatg ina survista detagliada da la situaziun. La decisiun dal cussegl federal ha engrevgià fermamain la confidenza en il sistem dad e-voting dal consorzi. Ultra da quai resultassan custs considerabels per adattar il sistem dad e-voting, che ha funcziunà fin ussa senza problems, a las pretensiuns da la confederaziun che valan dapi il 1. da zercladur 2015. Questas investiziuns n'èn betg giustifitgablas per ils chanceliers dals chantuns dal consorzi. Ils chanceliers dals chantuns participads han perquai decidì da betg sviluppar vinavant il sistem dad e-voting dal consorzi. Questa decisiun è vegnida communitgada a la chanceliera federala en il rom da la conferenza dals chanceliers dals 18/19 da settember 2015 a Berna.

Ils chantuns dal consorzi vegnan a sclerir en in proxim pass, co che la basa contractuala existenta dal consorzi po vegnir schliada anticipadamain en enclegientscha vicendaivla da tut ils partenaris dal project. La decisiun davart questa cunvegna da schliaziun è la finala chaussa da las regenzas dals chantuns dal consorzi.

La regenza dal chantun Grischun ha gia orientà la cumissiun per politica da stadi e strategia dal cussegl grond sco er ils presidents da las vischnancas, ch'eran sa messas a disposiziun per ils tests naziunals cun la votaziun electronica, davart la schliaziun intenziunada dal consorzi. Ella punctuescha ch'il chantun Grischun saja anc adina interessà d'introducir la votaziun electronica sut cundiziuns acceptablas. En quest senn vegnan examinadas eventualas novas cooperaziuns. Da recumenzar cun ils tests gia il proxim onn na vegn però betg ad esser pussaivel en vista a numerusas dumondas avertas davart l'ulteriur svilup da la votaziun electronica.


Infurmaziuns:
- chancelier dr. Claudio Riesen, tel. 081 257 22 21, e-mail: Claudio.Riesen@staka.gr.ch   


Gremi: chanzlia chantunala
Funtauna: rg chanzlia chantunala
Neuer Artikel