Navigation

Inhaltsbereich

  • Erste Mitteilung
  • Neuen Beitrag einfügen
Il fanadur dattan las vits bler da far, ina lavur suonda l'autra. La segunda mesadad d'avust cumenzan las ivas a midar colur, in segn segir ch’ellas cumenzan a madirar. En ina seria da films documentescha la chanzlia chantunala dal Grischun la viticultura al Plantahof a Landquart durant l'onn 2015.

Las viticulturas ed ils viticulturs na pon far naginas vacanzas durant il fanadur, perquai che las vits creschan enormamain. Ellas profiteschan da la chalur e da las precipitaziuns occasiunalas. Uschia èn ellas en cas da laschar crescher ina feglia per di, sche las cundiziuns èn optimalas. Per evitar che las vits daventian memia spessas, taglian las viticulturas ed ils viticulturs ils chatschs e determineschan uschia l'autezza da la paraid da feglia. La proxima lavur vi da las vits è quella da deliberar da la feglia las zonas da las ivas, per che las ivas possian profitar dal sulegl.
Las singulas coclas da las ivas creschan. L'emprim èn ellas fitg pitschnas, verdas e diras. Pir la segunda mesadad d'avust èn ellas bain vesaivlas, cur che las ivas alvas survegnan ina colur melna e las ivas cotschnas ina colur blauenta. Cun la midada da la colur cumenza la madiraziun da las ivas, lur paletscha daventa fina, il cuntegn d'acid sa reducescha ed il cuntegn da zutger crescha.
Cur che la colur sa mida, piglia la viticultura u il viticultur per mauns la forsch e reducescha in'ultima giada la racolta a la quantitad giavischada. Per amur da la qualitad taglia ella u el davent las ivas ch'èn anc verdas e che daventassan madiras pli tard.
La stad è stada optimala per las vits e per l'iva. Ellas han profità da la bell'aura dal fanadur e da l'avust, uschia che lur stadi da madiranza ha in avantatg da var 2 emnas. Uschia cumenza la racolta da l'iva alva la pli impurtanta, dal Riesling-Silvaner, gia mez settember. La racolta dal pinot noir, da la spezia d'iva la pli impurtanta, dastgass cumenzar la fin da settember u il cumenzament d'october.


Infurmaziuns:
- Hans Jüstrich, post spezialisà per pumicultura e viticultura al Plantahof, tel. 081 257 60 60, e-mail: Hans.Juestrich@plantahof.gr.ch


Gremi: Plantahof
Funtauna: rg Plantahof
Neuer Artikel