Navigation

Inhaltsbereich

  • Erste Mitteilung
  • Neuen Beitrag einfügen
Per l'onn da scola 2015/16 è cumparì il nov med d'instrucziun da lingua en rumantsch grischun per la 9. classa. Il med d'instrucziun "Siador" cumpiglia quatter cudeschs da lavur, commentaris per la persuna d'instrucziun sco er in disc accumpagnant. Supplementarmain è vegnì elavurà in nov cudesch da verbs e da grammatica, ed ina plattafurma d'emprender digitala pussibilitescha d'approfundar ils cuntegns en moda divertenta.

Il titel dal med d'instrucziun "Siador" stat per l'ultim onn da scola che las scolaras ed ils scolars fan per la finala pudair prender cumià a la fin da l'onn da scola – encuraschads tras las experientschas d'emprender fatgas durant il temp da la scola populara. L'emprim cudesch da lavur "Amur" cuntegna texts che tematiseschan las emprimas experientschas da l'esser inamurà, ma er las temas e las malsegirezzas. Uschia porscha el la pussaivladad da sviluppar ina lingua per ils sentiments. En il segund cudesch da lavur "Lingua" vegnan preschentadas domenas, en las qualas la lingua ha ina funcziun centrala e gioga ina rolla impurtanta. Tematisads vegnan per exempel l'utilisaziun ed il tractament da la lingua en las medias sco er la lingua sco med d'expressiun multifar en la scena da "slam poetry". En il terz cudesch da lavur "Siador" vegnan tractads temas sco la mort, il prender cumià e la fascinaziun per la musica, ma er l'occupaziun cun finamiras persunalas da la vita e cun ils siemis da la vita na vegn betg a la curta. Il quart cudesch da lavur "Ivettas" permetta a las scolaras ed als scolars da prender invista da la litteratura e da la cultura rumantscha. Sin basa da trais extracts da texts d'auturas giuvnas e d'auturs giuvens da differentas regiuns e da differents idioms è mintgamai vegnida elavurada ina retscha da lecziuns.
Ils quatter cudeschs da lavur han adina la funcziun d'in mussavia e preschentan las singulas incumbensas, porschan exercizis, tschentan dumondas per discussiuns e cuntegnan adina material supplementar per l'emprender individual ed autonom.

La bella concepziun grafica dal med d'instrucziun augmenta supplementarmain la qualitad e l'attractivitad. Il layout e las illustraziuns èn adattads a la vegliadetgna da las scolaras e dals scolars ed accumpognan ils cuntegns didactics en moda e maniera motivanta, porschan però la libertad da laschar girar l'atgna fantasia. En quai che reguarda la didactica e la metodica resguarda il med d'instrucziun differents nivels, diversas abilitads e differents tips d'emprender. Il med d'instrucziun cuntegna ultra da quai gieus didactics da differenta furma e da differentas finamiras.

Il commentari per la persuna d'instrucziun, che sustegna tala en la planisaziun da l'instrucziun, è formulà en moda fitg cumplessiva. Ultra da quai cuntegna el tut las soluziuns, tut ils models e tut las controllas d'emprender. Sco supplement dal med d'instrucziun è vegnì elavurà in cudesch da verbs e da grammatica per la 2. fin 9. classa che resumescha en moda survesaivla la conjugaziun d'ina gronda schelta da verbs sco er ils cuntegns ortografics e grammaticals e che stat a disposiziun a tut las persunas interessadas per la consultaziun. La plattafurma online www.siador.ch porscha tranter auter exercizis supplementars, ulteriur material illustrativ sco er tests d'emprender per ina preparaziun individuala dals examens.


Infurmaziuns:

- president da la regenza Martin Jäger, schef dal departament d'educaziun, cultura e protecziun da l'ambient, e-mail: Martin.Jaeger@ekud.gr.ch, tel. 081 257 27 01


Gremi: departament d'educaziun, cultura e protecziun da l'ambient
Funtauna: rg departament d'educaziun, cultura e protecziun da l'ambient
Neuer Artikel