Zum Seiteninhalt

Emprima badigliada per il nov edifizi cumplementar da la mensa e da la mediateca per la scola chantunala grischuna

  • Erste Mitteilung
  • Neuen Beitrag einfügen
L'emprima badigliada per il nov edifizi cumplementar da la mensa e da la mediateca sco er per ils locals per la protecziun dals bains culturals da l'uffizi da cultura dal Grischun è vegnida fatga oz. Las lavurs da construcziun duran circa 2 onns, la retratga dal nov edifizi cumplementar è planisada per il december 2017.

L'edifizi cumplementar al Münzweg a Cuira è il punct final da la renovaziun totala currenta da la scola chantunala grischuna a Cuira. La construcziun da la mensa e da la mediateca cumplettescha l'infrastructura da la scola chantunala grischuna ch'è vegnida sanada ed adattada pass per pass dapi l'onn 2006 ad in manaschi modern. En l'edifizi vegnan ultra da quai integrads locals per la protecziun dals bains culturals per la biblioteca chantunala e per l'archiv dal stadi dal Grischun.

Realisà vegn il project "DENYS" da l'architect Andreas Senn da Son Gagl ch'è vegnì eruì a chaschun d'ina concurrenza l'onn 2011. L'edifizi cumplementar vegn construì tenor il standard Minergie-P-ECO ed ha in implant da fotovoltaica sin il tetg plat. Cun l'implant po vegnir producida per onn bundant 46 000 kWh electricitad. Quai correspunda a circa 40 pertschient dal consum d'electricitad da l'edifizi cumplementar.

A chaschun da las exchavaziuns d'in onn en il mulin da munaidas vegl ha il servetsch archeologic dal Grischun pudì render visibla l'istorgia da passa 400 onns da quest edifizi. Ins ha chattà utensils da la producziun da munaida sco chazzettas (recipients resistents al fieu per preparar il metal da munaida), munaida nunelavurada (talers dal 18. chientaner), restanzas da la producziun (parts d'argient da la producziun da munaida) sco er cheramica da diever e ruments chasans.

Suenter ina planisaziun d'execuziun intensiva po quest atun vegnir stgavà il foss da construcziun e las lavurs da construcziun pon vegnir prendidas per mauns entaifer il termin fixà. Ils mirs da l'edifizi cumplementar vegnan ad esser construids probablamain la fin da l'onn 2016 ed il termin da la retratga è fixà per il december 2017.

-
fatschada ost


Infurmaziuns:
dr. Mario Cavigelli, schef dal departament da construcziun, traffic e selvicultura, tel. 081 257 36 01, e-mail: Mario.Cavigelli@bvfd.gr.ch
Markus Dünner, architect chantunal, uffizi da construcziun auta, tel. 081 257 36 31, e-mail: Markus.Duenner@hba.gr.ch


Gremi: uffizi da construcziun auta dal Grischun
Funtauna: rg uffizi da construcziun auta dal Grischun
Neuer Artikel