La campagna naziunala "Co vai cun tai?" vul gidar a destigmatisar malsognas psichicas e vul sensibilisar. A partir dals 19 d'october 2015 vegni rendì attent al tema er en il Grischun.

Malsognas psichicas vegnan savens taschentadas. Gist qua cumenza la campagna naziunala da la fundaziun Pro Mente Sana e da differents chantuns. Cun placats, cun ina broschura e cun ina pagina d'internet duai vegnir lantschà il tema en la publicitad. "Co vai cun tai?" vul sensibilisar per il fatg, ch'igl è impurtant da discurrer davart malsognas psichicas. Plinavant vul la campagna eliminar pregiudizis negativs, derasar enconuschientschas davart malsognas psichicas e gidar a mitigiar l'exclusiun da las persunas pertutgadas.

Activitads en il Grischun
En collavuraziun cun ils servetschs psichiatrics dal Grischun (SPGR) è il chantun Grischun medemamain responsabel per la campagna. Durant duas emnas a la lunga a partir dals 19 d'october 2015 vegnan ad esser preschents placats gronds e reclamas al monitur en ils bus da l'entir chantun. Las vischnancas vegnan envidadas da sustegnair activamain la campagna cun pender si placats en lur vischnanca e cun metter a disposiziun broschuras. Ultra da quai vegnan intgins cafés e restaurants a servir "tschigulattins da Co vai cun tai" per far attent a la campagna.