Cuntegn da la pagina

Reglà da nov la collavuraziun tranter la polizia chantunala dal Grischun ed il corp da guardias da cunfin

  • Erste Mitteilung
  • Neuen Beitrag einfügen
Cusseglier guvernativ Christian Rathgeb e directur general da duana Rudolf Dietrich han suttascrit oz a Haldenstein ina cunvegna, cun la quala vegn optimada la collavuraziun existenta tranter la polizia chantunala dal Grischun ed il corp da guardias da cunfin (Cgcf) resp. l'administraziun federala da duana (AFD).

La collavuraziun tranter la polizia chantunala ed il Cgcf resp. la AFD è sa cumprovada ils ultims onns sco fitg preziusa. I po vegnir profità da sinergias che resultan dals puncts cuminaivels tranter las incumbensas da duana dal dretg federal e las cumpetenzas da la polizia chantunala. Quai pertutga spezialmain il territori da cunfin da las vals dal sid dal chantun, nua che la polizia chantunala ed il Cgcf fan regularmain patruglia ensemen. Il contract fixà da nov remplazza ina cunvegna da l'onn 2008. El cuntegna adattaziuns a differentas midadas da lescha e las enconuschientschas ch'èn vegnidas fatgas en connex cun la collavuraziun.
La collavuraziun duai vegnir extendida e daventar pli efficazia. En il nov contract vegnan regladas detagliadamain activitads cuminaivlas, particularmain las patruglias cuminaivlas sco er la realisaziun d'acziuns cuminaivlas en il territori da cunfin. Ultra da quai survegn il corp da guardias da cunfin cumpetenzas supplementaras, per exempel po el rapportar autonomamain a la procura publica u chastiar independentamain tscherts surpassaments da la lescha da narcotics. Plinavant survegn il Cgcf dapli cumpetenzas en cas da cuntravenziuns cunter la lescha federala davart las persunas estras.
Las gruppas d'acziun mobilas da l'administraziun federala da duana survegnan da nov la cumpetenza da denunziar cuntravenziuns cunter l'ordinaziun davart il temp da lavur ed il temp da paus dal dretg davart il traffic sin via. La finala è er vegnì coordinà da nov l'agir da la polizia chantunala e dal Cgcf tar cas gravants ed urgents da la defensiun cunter privels. Il medem mument è la collavuraziun vegnida concepida en moda pli flexibla. En l'avegnir po la polizia chantunala delegar – cun il consentiment dal departament – ulteriuras incumbensas, per ch'ellas vegnian liquidadas autonomamain.

Fotografia agiuntada:
-

Cusseglier guvernativ Christian Rathgeb (a sanestra) e directur general da duana Rudolf Dietrich suttascrivan en il chastè da Haldenstein la cunvegna administrativa davart la collavuraziun tranter la polizia chantunala dal Grischun ed il corp da guardias da cunfin.


Infurmaziuns:

Cusseglier guvernativ dr. Christian Rathgeb, schef dal departament da giustia, segirezza e sanadad, tel. 081 257 25 01, e-mail: Christian.Rathgeb@djsg.gr.ch  


Gremi: departament da giustia, segirezza e sanadad
Funtauna: departament da giustia, segirezza e sanadad
Neuer Artikel