Navigation

Inhaltsbereich

  • Erste Mitteilung
  • Neuen Beitrag einfügen
La cumissiun per sanadad e fatgs socials propona al cussegl grond d'acceptar la missiva da la regenza tar la revisiun parziala da la lescha per promover la tgira da persunas malsaunas. La finamira è quella da porscher a persunas che vivan en relaziuns finanzialas difficilas furmas da l'abitar assistì sco cumplettaziun da l'abitar a chasa e sco alternativa a l'entrada en ina chasa da tgira.

La cumissiun per sanadad e fatgs socials (CSF) ha predeliberà la missiva da la regenza tar la revisiun parziala da la lescha per promover la tgira da persunas malsaunas. La sesida è vegnida presidiada da la deputada e presidenta da la cumissiun Christina Bucher-Brini. A la sesida han prendì part er il cusseglier guvernativ Christian Rathgeb sco er ina represchentanza da l'uffizi da sanadad e da l'institut d'assicuranza sociala.

L'intent dal project è quel da porscher a persunas attempadas che na vulan u na pon betg pli viver a chasa malgrà lur pitschen basegn da tgira ina cumplettaziun da l'abitar a chasa ed in'alternativa a l'entrada en ina chasa da tgira. Per che l'abitar assistì stettia a disposiziun er a quellas persunas che vivan en relaziuns finanzialas difficilas, vegn stgaffida cun la revisiun parziala da la lescha per promover la tgira da persunas malsaunas la basa legala per garantir prestaziuns supplementaras a locatarias ed a locataris d'abitaziuns assistidas.

La cumissiun renconuscha il basegn d'agir per l'abitar assistì che s'orientescha al princip "ambulant avant staziunar" ed è entrada unanimamain en il project. La cumissiun va er perina concernent il concept che la regenza ha proponì per concepir l'abitar assistì. Unicamain tar la grondezza pretendida per renconuscher talas instituziuns propona la cumissiun unanimamain in cumplettaziun: da princip duain quellas, sco previs en il sboz da lescha, cumpigliar almain sis unitads d'abitar. Sch'ina instituziun per l'abitar assistì è però attatgada ad ina purschida per la tgira e l'assistenza staziunara per pazientas e per pazients da lunga durada u per persunas attempadas, dastga il dumber minimal d'unitads d'abitar vegnir sutpassà.

Il cussegl grond vegn a tractar questa fatschenta en la sessiun da december 2015.


Infurmaziuns:
presidenta da la cumissiun Christina Bucher-Brini, tel. 078 818 77 72


Gremi: cumissiun per sanadad e fatgs socials
Funtauna: rg cumissiun per sanadad e fatgs socials
Neuer Artikel