Cuntegn da la pagina

Pli svelt cun il tren da la Germania en il Grischun

  • Erste Mitteilung
  • Neuen Beitrag einfügen
Grazia a colliaziuns directas dal ICE en Germania e viceversa daventa il Grischun anc pli attractiv a partir da la midada da l'urari ils 13 da december 2015. Er a persunas che penduleschan a la lavur porta la midada da l'urari ina colliaziun da baud a l'eroport da Turitg senza stuair midar tren. Ina nova colliaziun permetta da viagiar la fin d'emna er anc tard da Turitg a Cuira.

La proxima midada da l'urari porta al Grischun meglieraziuns en la purschida dal traffic public. Da nov circuleschan colliaziuns dal ICE tranter Cuira e Francfurt/Main e Hamburg. Cun trens attractivs d'auta sveltezza vegn garantida ina colliaziun pli svelta e pli confortabla tranter il Grischun e la Germania. Ils trens ICE per Hamburg partan mintga di a las 10.39 ed a las 12.39 da Cuira.
Dumengia, ils 13 da december 2015, a las 16.00, vegn battegià in tren ICE a la staziun da Cuira sin il binari 5. La populaziun è envidada da far part da questa ceremonia speziala.
Tras ina colliaziun supplementara d'intercity che parta a las 06.39 da Cuira ed a las 06.49 da Landquart profiteschan persunas che penduleschan a Turitg en l'avegnir d'ina novaziun attractiva (arrivada a las 07.53). I sa tracta plinavant da l'emprima colliaziun dal Grischun cun l'eroport da Turitg senza ch'ins stuess midar tren. Tras questa colliaziun vegn ademplida ina part da las pretensiuns ch'il chantun exprima dapi blers onns, numnadamain da survegnir colliaziuns directas cun l'eroport da Turitg.
Las notgs dal venderdi sin la sonda e da la sonda sin la dumengia cursescha da nov ina colliaziun da tard accelerada da la staziun principala Turitg a Cuira, cun fermadas a Thalwil, Wädenswil, Sargans, Ragaz Bogn, Maiavilla e Landquart. Quest tren parta a las 00.20 da la staziun principala Turitg. A Landquart (arrivada a las 01.28) è garantida la colliaziun cun ils bus da notg en direcziun dad Igis-Zizers-Cuira (partenza a las 01.39) e da Malans-Jenins (partenza a las 01.40). A Cuira (arrivada a las 01.36) è garantida la colliaziun vers Domat (partenza a las 01.45).
En direcziun da Laax vegnan medemamain purschidas la fin d'emna colliaziuns da tard a las 00.50 ed a las 02.15 davent da la staziun d'autos da posta Cuira. L'ultim curs per Laax cuntinuescha en cas da basegn ses viadi fin a Glion.
Per ademplir il basegn pli e pli grond da la clientella d'avair meglras colliaziuns da tact vegn a medem temp condensà ed optimà l'urari en Val Müstair, en Tumleastga ed en il Signuradi.


Infurmaziuns
Thierry Müller, uffizi d'energia e da traffic, manader dal project "traffic public", tel. 081 257 36 04, e-mail Thierry.Mueller@aev.gr.ch  


Gremi: uffizi d'energia e da traffic
Funtauna: rg uffizi d'energia e da traffic
Neuer Artikel