Navigaziun principala

Cuntegn da la pagina

Vernissascha dal cudesch: L'autobiografia da Bartholomäus Anhorn

  • Erste Mitteilung
  • Neuen Beitrag einfügen
Per la fin da l'onn preschenta l'archiv dal stadi dal Grischun ina nova publicaziun en la retscha funtaunas e retschertgas davart l'istorgia grischuna. La vernissascha ha liug mesemna, ils 16 da december 2015, a las 17.30 uras, en l'archiv dal stadi dal Grischun.

Il cudesch Vita Bartholomaei Anhornii. L'autobiografia dal reverenda Bartholomäus Anhorn (1566–1640) or dal temp dals scumbigls grischuns è ina da las pli impurtantas ovras autobiograficas dal 17avel tschientaner. Lorenz Heiligensetzer ed Ursus Brunold han edì e commentà l'ovra dad Anhorn che n'è fin ussa betg anc publitgada.

Bartholomäus Anhorn (1566–1640) è oriund da Fläsch. El ha pratitgà là ed a Maiavilla sco reverenda avant ch'el ha pervia da la guerra stuì fugir a Son Gagl. Sia veta ha el concludì ad Appenzell. Anhorn è enconuschent sco in dals pli impurtants cronists da sia epoca. La autobiografia dad Anhorn tracta da dirs onns da giuventetgna, da la lavur sco reverenda, da la fugia e da l'exil. Plinavant descriva Anhorn en moda detagliada e viva ils eveniments dramatics duront las revoltas en Vuclina ed en Partenz. Uschia datti referiments tar sias ovras istoricas. Remartgabels èn è ils dissegns dad Anhorn che l'autobiografia cuntegna. Il dissegn sin la cuverta mussa "la miracla dals trais sulegls".

Ils dus auturs mettan l'autobiografia dad Anhorn en in context istoric e fan referiments tar auters documents contemporans. Uschia furneschan els ina represchentaziun cun in commentari critic da quella autobiografia singulara dad ina da las pli interessantas epocas da l'istorgia grischuna.

La vernissascha ha liug mesemna, ils 16 da december 2015, a las 17.30 uras, en l'archiv dal stadi dal Grischun (Cuira, Karlihofplatz, terza auzada).


Infurmaziun:
Reto Weiss, archivari dal stadi, tel. 081 257 28 01, e-mail: Reto.Weiss@sag.gr.ch


Gremi: uffizi da cultura / archiv dal stadi
Funtauna: rg uffizi da cultura / archiv dal stadi
Neuer Artikel