La regenza dal chantun Grischun ed il president da la regiun taliana Lumbardia, Roberto Maroni, han suttascrit ina decleraziun d'intenziun per ina cooperaziun transcunfinala.
L'intensivaziun da la collavuraziun ha cumenzà cun in inscunter da las delegaziuns da la regenza e dal parlament dal chantun Grischun e da la regiun Lumbardia da l'atun 2014 a Le Prese (Puschlav). Quella giada era vegnì mess il fundament per ina nova èra da la collavuraziun transcunfinala. Cun questa cunvegna han ils dus partenaris la finamira da promover il svilup economic dal territori da cunfin cuminaivel e da prender per mauns las sfidas en secturs tematics d'in interess vicendaivel.
Economia, sanadad e traffic
En il center da las stentas stattan ils secturs economia, sanadad e traffic. Areguard las relaziuns commerzialas duai uschia vegnir instituziunalisà in barat d'infurmaziuns sin il plaun respectiv per facilitar a l'economia privata la collavuraziun transcunfinala. En il sectur da la sanadad duain vegnir lantschads projects cun l'intent da meglierar il provediment general da la sanadad ed il servetsch da salvament en la regiun da cunfin cuminaivla. Plinavant duain vegnir discutadas e realisadas soluziuns per il traffic da transit. En il sectur dal traffic public transcunfinal è er prioritara ina collavuraziun pli intensiva tranter la Lumbardia ed il Grischun, quai cun l'intent da meglierar las purschidas.
Inscunters politics
En la decleraziun d'intenziun fixeschan ils partenaris plinavant che delegaziuns politicas duain sa scuntrar regularmain per discutar davart il stadi da la collavuraziun currenta e per examinar in eventual basegn d'agir en auters secturs tematics. Quai garantescha che contacts permanents da la politica e da l'administraziun pussibiliteschan da schliar problems en il territori damanaivel dal cunfin en moda svelta e nuncumplitgada.
Infurmaziuns:
president da la regenza Christian Rathgeb, schef dal departament da giustia, segirezza e sanadad, tel. 081 257 25 01, e-mail:
Christian.Rathgeb@djsg.gr.ch
Gremi: regenza
Funtauna: rg chanzlia chantunala dal Grischun