Regularmain duvrain nus en noss mintgadi products chemics, saja quai per nettegiar, per lavurar en iert u per zambergiar en il tschaler. Igl è impurtant d'esser conscient – duvrond talas substanzas – dals privels ch'i pon resultar, sche questas substanzas vegnan duvradas fallidamain. In nov video da la chanzlia chantunala dat tips per ir enturn correctamain cun products chemics en il mintgadi.

Chemicalias che vegnan duvradas en las chasadas èn bleras giadas responsablas per tissientadas d'uffants e da creschids. La cussegliaziun en cas d'urgenza da Tox Info Suisse sur il numer 145 stat a disposiziun di e notg a persunas laicas sco er a persunas dal fatg. L'onn 2015 ha Tox Info Suisse fatg passa 38 000 cussegliaziuns areguard tissientadas. 92 pertschient da las dumondas èn vegnidas tschentadas pervia d'in contact cun ina substanza toxica, il rest è stà da natira preventiva. Da las tissientadas èn stads pertutgads oravant tut uffants (54 pertschient), da quels na gievan 85 pertschient betg anc a scola. Tissientadas cun products dal tegnairchasa pudessan vegnir impedidas en fitg blers cas, sch'ils products vegnissan depositads uschia, ch'ils uffants n'als pon betg cuntanscher. Tar products dal tegnairchasa stoi ultra da quai vegnir dà adatg ch'els vegnian conservads en l'emballadi original e ch'els na vegnian betg mess en auters recipients, spezialmain betg en buttiglias da baiver. Avant che duvrar quests products sto vegnir legida l'instrucziun da diever e las indicaziuns da la quantitad ston vegnir observadas. Impurtant èsi er da dismetter correctamain ils rests da quests products.


Infurmaziuns:
Roland Fiechter, manader "segirezza da las substanzas chemicas", uffizi per la segirezza da victualias e per la sanadad d'animals, tel. 081 257 26 78, e-mail: Roland.Fiechter@alt.gr.ch  


Gremi: uffizi per la segirezza da victualias e per la sanadad d'animals
Funtauna: rg uffizi per la segirezza da victualias e per la sanadad d'animals