Fin l'atun fa il president da la regenza Christian Rathgeb ina visita a tut ils diesch ospitals regiunals dal Grischun. Sco gia avant 3 onns vul el discutar al lieu cun las persunas ch'èn responsablas per ils ospitals davart dumondas e davart temas actuals.
Las visitas servan a discussiunar ils problems da l'ospital respectiv ed a mussar eventualas soluziuns. Sin il program stattan tranter auter temas sco la situaziun finanziala e persunala da l'ospital u er la collavuraziun cun ils auters furniturs da prestaziuns en la regiun d'ospital. La finala interessescha er, co che las persunas responsablas giuditgeschan il posiziunament da lur ospital a lunga vista en la cuntrada d'ospitals dal chantun. Il schef dal departament da giustia, segirezza e sanadad spera ch'ils contacts cun las persunas ch'èn responsablas per ils ospitals regiunals portian impuls per sviluppar vinavant la politica d'ospitals dal chantun. Ils ospitals regiunals èn pitgas impurtantas per il provediment da la sanadad dal chantun. En cooperaziun cun l'ospital chantunal dal Grischun garanteschan els che la populaziun da tut las parts dal chantun haja access a las prestaziuns d'ospital necessarias, e quai entaifer in temp acceptabel ord vista medicinala e sociala.
A partir da mez zercladur fin l'atun 2016 vegn Christian Rathgeb a visitar tut ils ospitals regiunals sco er la clinica Gut. Accumpagnà vegn el da ses collavuraturs ils pli stretgs, Claudio Candinas, secretari dal departament, e Rudolf Leuthold, manader da l'uffizi da sanadad. Sco emprim ospital vegn visità ils 10 da zercladur l'ospital da l'Engiadina bassa a Scuol. Las collavuraturas ed ils collavuraturs da las medias han la pussaivladad da prender part a las visitas dals ospitals e da far dumondas. L'invitaziun succeda mintgamai tras ils ospitals regiunals.
Survista da las visitas dals ospitals:
| ospital da l'Engiadina bassa, Scuol |
10 da zercladur 2016 |
| ospital dal Surses, Savognin |
1. da fanadur 2016 |
| ospital da Tavau |
25 d'avust 2016 |
| ospital da l'Engiadin'ota, Samedan |
26 d'avust 2016 |
| ospital da la Bregaglia, Promontogno |
26 d'avust 2016 |
| clinica Gut, San Murezzan |
9 da settember 2016 |
| ospital da la Val Müstair, Sta. Maria |
16 da settember 2016 |
| ospital da la Surselva, Glion |
21 d'october 2016 |
| ospital San Sisto, Puschlav |
31 d'october 2016 |
| ospital da Schiers |
4 da november 2016 |
| ospital da Tusaun |
11 da november 2016 |
Infurmaziuns:
president da la regenza dr. Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch
Gremi: departament da giustia, segirezza e sanadad
Funtauna: rg departament da giustia, segirezza e sanadad