En il Grischun han 16 bibliotecarias terminà dacurt lur scolaziun e survegnì il certificat da la cuminanza da lavur da las bibliotecas svizras da lectura publica (CLP).

En las passa 50 bibliotecas da scola e bibliotecas communalas dal chantun vegn prestada ina lavur da biblioteca cumpetenta. Quai cun il sustegn da la biblioteca chantunala dal Grischun, nua ch'i vegnan purschids regularmain perfecziunaments per persunas creschidas. Quests perfecziunaments adempleschan las prescripziuns da qualitad tenor las directivas vertentas da la cuminanza da lavur da las bibliotecas svizras da lectura publica (CLP). Ils curs vegnan organisads da l'incumbensada chantunala da las bibliotecas Theres Schlienger en num da la cumissiun da biblioteca dal Grischun. Il curs fundamental da la CLP terminescha suenter 27 dis d'instrucziun cun in examen.

Dacurt han 16 absolventas survegnì il certificat da la CLP a chaschun da la festa da finiziun. En il chantun Grischun èsi impurtant per bibliotecarias e per bibliotecaris da nizzegiar sinergias, da sa preschentar communablamain e da furmar ina rait ensemen cun las autras bibliotecas grischunas. Uschia pon las purschidas ed ils servetschs da las singulas bibliotecas vegnir coordinads optimalmain in cun l'auter.

In certificat han survegnì:
Briggen Ursula, Niederurnen; Brunner Heidi, Kaltbrunn; Eggenberger Ramona, Buchs; Flores Jost Tania, Cuira; Heiber Nadja, Claustra Vitg; Hidber Therese, Sargans; Hoppe Christiane, Wollerau; Jakob Jeannette, Samedan; Lampert Agnes, Jenins; Lauterbach Sibylle, Schiers; Mosca Caroline, Scuol; Muzzarelli Gaby, Küblis; Roth Nino, Cuira; Schneller Yvonne, Grüsch; Sprecher Bernadette, Domat; van Schagen Natascha, Claustra.

Fotografia agiuntada:
 
Tut las 16 participantas han reussì l'examen dal curs da scolaziun.


Infurmaziuns:
Petronella Däscher, bibliotecaria chantunala, tel. 081 257 28 21, e-mail: Petronella.Daescher@kbg.gr.ch  


Gremi: Biblioteca chantunala dal Grischun
Funtauna: rg biblioteca chantunala dal Grischun