La regenza grischuna ha elegì Gian-Reto Meier-Gort sco nov manader da l'autoritad per la protecziun d'uffants e da creschids (APUC) dal Grischun dal nord. Gian-Reto Meier-Gort ha la responsabladad per manar questa autoritad ed è commember da la direcziun da la APUC en il Grischun.

La regenza grischuna ha elegì lic. iur. Gian-Reto Meier-Gort che ha 37 onns sco nov manader da l'autoritad per la protecziun d'uffants e da creschids (APUC) dal Grischun dal nord a partir dal 1. da settember 2016. Actualmain è Meier-Gort commember da l'autoritad da la APUC dal Grischun dal nord e docent per dretg da la protecziun d'uffants e da creschids a la scola spezialisada superiura da pedagogia sociala SSS a Zizers. Avant ha el lavurà en il servetsch giuridic da l'anteriura autoritad tutelara dal circul da Cuira e pli tard sco commember da questa autoritad. El daventa successur da lic. iur. Peter Dörflinger che vegn a surpigliar a partir dal settember la direcziun da la APUC da l'Appenzell dador.

Sco manader da la APUC dal Grischun cun 23 collavuraturas e collavuraturs dal nord surpiglia Meier-Gort la direcziun da l'autoritad organisatoricamain la pli gronda da las tschintg autoritads spezialisadas chantunalas en il sectur da la protecziun d'uffants e da creschids. La APUC dal Grischun dal nord è cumpetenta per il scleriment, per l'ordinaziun, per la surveglianza e per l'accumpagnament da mesiras dal dretg da protecziun d'uffants e da creschids en ils districts Landquart, Plessur e Plaun. Ultra da quai è il manader responsabel per la collavuraziun e per l'entretschament cun las autras APUC, cun las curatellas professiunalas e cun autras organisaziuns partenarias. La direcziun da la APUC dal Grischun sa cumpona da las manadras e dals manaders da las tschintg APUC chantunalas. Meier-Gort è maridà e bab da dus uffants.

Fotografia