La regenza grischuna ha deliberà per mauns dal cussegl grond ina missiva per ina revisiun parziala da la lescha dal persunal. L'automatissem, tenor il qual mintgamai 1 pertschient da la summa dals salaris sto vegnir mess a disposiziun en il preventiv per il svilup dals salaris, duai vegnir abolì. Ultra da quai vegnan tranter auter meglieradas la protecziun da datas e la protecziun giuridica sco er la protecziun da las dunnas en speranza e la protecziun da la maternitad.

Ils 14 da schaner 2014 aveva la regenza suttamess al cussegl grond ina missiva ed in sboz per ina revisiun totala da la lescha davart la relaziun da lavur da las collavuraturas e dals collavuraturs dal chantun Grischun (lescha dal persunal). En la sessiun d'avrigl 2014 aveva il cussegl grond concludì da betg tractar il project; la revisiun totala aveva pia fatg naufragi.

En la sessiun da favrer 2015 ha il cussegl grond lura dà l'incarica da prender per mauns – empè d'ina revisiun totala – ina revisiun parziala da la lescha dal persunal. La finamira da l'incarica era quella d'augmentar la flexibilitad tar il svilup dals salaris, da serrar largias da regulaziun e da far adattaziuns en consequenza dal dretg superiur.

La revisiun parziala ch'è ussa avant maun cuntegna principalmain ils suandants puncts:

• L'automatissem, tenor il qual la summa dals salaris vegn auzada mintga onn per 1 pertschient per il svilup dals salaris, vegn abolì. Questa aboliziun, che correspunda al program da la regenza 2013-2016, aveva la regenza gia previs en il project da la revisiun totala. Uschia po il cussegl grond decider mintga onn pli libramain davart l'augment da la summa dals salaris per svilups individuals dals salaris. Prendend questa decisiun na sto el betg mo resguardar la situaziun finanziala ed economica e las relaziuns sin il martgà da lavur, mabain er il svilup dals salaris en autras administraziuns publicas ed en l'economia privata.
• La regulaziun da las occupaziuns accessoricas vegn cumplettada cun in'obligaziun generala d'annunzia.
• Per elavurar datas persunalas, en spezial per manar sistems electronics d'infurmaziun dal persunal e dossiers electronics dal persunal, vegnan stgaffidas las basas giuridicas necessarias.
• La protecziun giuridica vegn concepida confurm a la constituziun, tras quai ch'i po da nov vegnir fatg recurs tar ina dretgira chantunala superiura cunter mintga decisiun en dispitas dal dretg da persunal.
• Per l'engaschament e per la desditga da persunas d'instrucziun a las scolas chantunalas è responsabla da nov la direcziun da la scola.
• Per meglierar la cumpatibilitad da la professiun cun la famiglia vegn extendì il congedi da maternitad, ed il congedi da paternitad e d'adopziun vegn francà explicitamain en la lescha. Il congedi da gravidanza da duas emnas avant la pagliola vegn abolì; percunter vegnan extendidas la protecziun da la sanadad da las dunnas en speranza e la protecziun da la maternitad.

Il cussegl grond vegn a tractar questa fatschenta en la sessiun d'avust 2016. La revisiun da la lescha duai entrar en vigur il 1. da schaner 2017.


Infurmaziuns:
cussegliera guvernativa Barbara Janom Steiner, scheffa dal departament da finanzas e vischnancas, tel. 081 257 32 01, e-mail: Barbara.Janom@dfg.gr.ch


Gremi: regenza
Funtauna: rg chanzlia chantunala dal Grischun