En la sessiun d'avust 2016 vegn il cussegl grond a decider davart in'ulteriura fusiun da vischnancas. La regenza suttametta al parlament ina missiva per la fusiun da las trais vischnancas da Leggia, Grono e Verdabbio en il Mesauc a la vischnanca da Grono. La fusiun duai entrar en vigur il 1. da schaner 2017. Uschia sa reducescha il dumber da vischnancas en il chantun a 112 (onn 2016: 114).
Nova vischnanca da Grono
En la regiun Moesa fusiuneschan las trais vischnancas da Leggia, Grono e Verdabbio a la nova vischnanca da Grono. La fusiun da vischnancas è il resultat da stentas che han l'intent da realisar refurmas territorialas en la regiun e che duran gia dapi in detg temp. In project che vuleva ina fusiun structurala da tut las vischnancas dal Mesauc ad ina u eventualmain a duas vischnancas n'ha gì nagin success. Da quai è dentant resultà in project pli pitschen cun las trais vischnancas da Leggia, Grono e Verdabbio. Cun questa fusiun na vegn il process da refurma en la vallada betg anc ad esser a fin. Per il 1. da schaner 2015 han gia quatter vischnancas da la Val Calanca fusiunà a la vischnanca da Calanca.
Cun resultats tranter 80 e 94 pertschient da las vuschs han las votantas ed ils votants da las vischnancas da Grono, Leggia e Verdabbio acceptà ils 29 da november 2015 cleramain il contract da fusiun. Tras la fusiun resulta ina vischnanca cun circa 1300 abitantas ed abitants sco er cun ina surfatscha da 3709 hectaras. Las vischnancas che fusiuneschan collavuran dapi onns en moda intensiva en differents secturs. Cooperaziuns existan er sur ils cunfins da la nova vischnanca ora.
La fusiun da vischnancas vegn sustegnida dal chantun cun ina contribuziun da promoziun da totalmain 5,41 milliuns francs.
Il cussegl grond vegn a decider davart la fusiun da vischnancas en la sessiun d'avust 2016.
Infurmaziuns:
cussegliera guvernativa Barbara Janom Steiner, scheffa dal departament da finanzas e vischnancas, tel. 081 257 32 01, e-mail:
Barbara.Janom@dfg.gr.ch
Gremi: regenza
Funtauna: rg chanzlia chantunala dal Grischun