Il dumber da scolaras e scolars en il chantun Grischun mussa ina tendenza regressiva tant en las scolas primaras sco er en las scolas medias. Tuttina èn quest onn puspè dapli giuvenils che l'onn precedent sa decidids d'absolver l'examen d'admissiun ad ina scola media grischuna.
La primavaira han gì lieu ils examens d'admissiun chantunals per entrar en ina scola media grischuna. Tut en tut han 797 (2015: 739) scolaras e scolars da las scolas primaras e secundaras absolvì ils examens d'admissiun en las nov scolas medias en il chantun Grischun.
Da las 366 (2015: 337) scolaras e scolars primars che han absolvì ils 16 da favrer 2016 in examen d'admissiun per la 1. classa dal gimnasi da lunga durada, han 224 (2015: 228) fatg quel cun success. Quai correspunda – sco gia l'onn precedent – a var 13 pertschient da tut las scolaras e da tut ils scolars da la 6. classa primara.
Dals 431 (2015: 402) giuvenils che han fatg l'examen d'admissiun chantunal per la 3. classa dal gimnasi sco er per la 1. classa da la scola media commerziala u da la scola media spezialisada (examen unifitgà) dals 15 da mars 2016, e quai directamain or da la scola secundara u suenter avair absolvì quella, han 307 (2015: 308) dumagnà l'admissiun ad ina scola media grischuna. 191 (2015: 191) candidatas e candidats han ademplì las premissas per entrar en la 3. classa dal gimnasi; 116 (2015: 117) candidatas e candidats han cuntanschì l'admissiun per entrar en la 1. classa da la scola media commerziala u scola media spezialisada.
Ussa che l'examen unifitgà da quest onn è terminà e resguardond quels giuvenils, ch'èn entrads gia l'onn da scola 2014/15 en il gimnasi inferiur, pon ins constatar che stgars 24 pertschient da tut las scolaras e da tut ils scolars che han frequentà l'onn da scola 2013/14 la 6. classa d'ina scola primara grischuna èn qualifitgads per absolver la partiziun gimnasiala d'ina scola media grischuna.
Infurmaziuns:
Regina Just Brodbeck, uffizi per la furmaziun media-superiura, manadra da la partiziun "scolas medias", tel. 081 257 61 69, e-mail:
Regina.JustBrodbeck@ahb.gr.ch
Gremi: uffizi per la furmaziun media-superiura
Funtauna: rg uffizi per la furmaziun media-superiura