La regenza grischuna ha approvà trais programs per promover talents en ils secturs dal sport e da la musica sco er las revisiuns parzialas da las planisaziuns localas da Vaz e da Mustér.

Approvà trais programs da promoziun
La regenza ha approvà trais programs per promover talents en ils secturs dal sport e da la musica.
Il program da promoziun da la Scola media evangelica Schiers en il sectur da la musica da la 3. fin a la 6. classa gimnasiala vegn approvà. Plinavant vegn approvà il program da promoziun da la Fundaziun per il gimnasi da sport da Tavau en il sectur dal sport da la 3. fin a la 7. classa gimnasiala sco er da la 1. fin a la 4. classa da la scola media commerziala. Ultra da quai vegn approvà il program da promoziun da l'Academia Engiadina en il sectur da la musica da la 1. fin a la 6. classa gimnasiala sco er da la 1. fin a la 3. classa da la scola media spezialisada. Las approvaziuns da tut ils trais programs per promover talents valan retroactivamain per il 1. d'avust 2015. Sin basa da la lescha davart las scolas medias en il chantun Grischun pon las scolas medias promover scolaras e scolars che han talents spezials. A scolas medias privatas cun programs da promoziun approvads vegn pajada ina pauschala da talent dad annualmain 1000 francs per scolara u per scolar che sa participescha.

Approvà la revisiun parziala da la planisaziun locala da Vaz
La revisiun parziala da la planisaziun locala, ch'è vegnida concludida ils 24 d'avrigl 2016 da la vischnanca da Vaz, vegn approvada da la regenza.
Cun questa planisaziun duai vegnir pussibilità in nov hotel sin l'areal da la staziun da val Canols da la pendiculara dal Corn cotschen. Planisà è in hotel favuraivel cun totalmain var 96 stanzas (4 chombras a trais letgs, accessiblas en sutga cun rodas, 28 chombras a trais letgs per umans cun impediments da chaminar sco er 64 chombras dublas).

 © Fortimo Invest AG

Approvà la revisiun parziala da la planisaziun locala da Mustér
La revisiun parziala da la planisaziun locala, ch'è vegnida concludida ils 29 da november 2015 da la vischnanca da Mustér, vegn approvada da la regenza.
Tar la staziun da val da la pendiculara "Mustér – Caischavedra" duai vegnir construì in resort ("Resort Catrina") cun hotels, cun letgs explotads sco er cun manaschis da mastergn e da servetsch. Per pudair pussibilitar quest project ord vista dal dretg da planisaziun e da construcziun vegn la planisaziun locala cumplettada cun ina "zona speziala Catrina".
Plinavant vegn la zona da mastergn existenta "Pignola/Marias" engrondida per var 6839 m2 per pussibilitar a l'interpresa "Rhomberg Sersa Rail Group" da domiciliar in nov lieu da manaschi en la vischnanca da Mustér. Cun la revisiun parziala da la planisaziun locala vegn ultra da quai stgaffida la basa per ch'il hotel Disentiserhof possia augmentar sia purschida da letgs d'hotel chauds.

Approvà il project per curreger la via da Breil
La regenza ha approvà il project d'exposiziun per la correcziun da la via da Breil cun intginas cundiziuns sco er cun las permissiuns spezialas.
La via da Breil fa part da la rait chantunala da vias da colliaziun. Ella collia ils abitadis da la vischnanca da Breil ed è l'access principal a la regiun da vacanzas Breil – Vuorz – Andiast. La via da Breil è per part fitg stretga e nunsurvesaivla. Ultra da quai ha la via donns perquai che sia surstructura n'è betg resistenta a la schelira. La correcziun da la via vegn realisada tranter Danis e Breil e tanghescha il traject entaifer il vitg da Dardin. Il project cumpiglia la renovaziun, il schlargiament ed il rinforzament da la via sco er l'augment da la segirezza dal traffic.



Sanaziun da l'Ovra electrica Calancasca SA
La regenza dispona la sanaziun da l'aua restanta prescritta da la lescha per la Calancasca SA (CAL). Tras quai vegn la CAL obligada da dosar tenor stagiun l'aua da la Calancasca davent dal mir da fermada Molina. Questa disposiziun da sanaziun permetta da far in ulteriur pass impurtant en connex cun las sanaziuns da l'aua restanta en il Grischun. Per 158 da totalmain 224 tschiffadas d'aua è la sanaziun da l'aua restanta ussa liquidada ubain datti soluziuns da princip. Las ovras electricas respectivas cumpiglian passa 75 pertschient da la producziun totala dal chantun.

Gremi: regenza
Funtauna: rg chanzlia chantunala dal Grischun