L'ambassadura Suzan G. LeVine ha visità oz – sin invitaziun da la regenza grischuna – il chantun Grischun.
L'ambassadura Suzan G. LeVine è vegnida beneventada oz en la chasa grischa a Cuira dal president da la regenza Christian Rathgeb, da la cussegliera guvernativa Barbara Janom Steiner e dal chancelier Claudio Riesen. L'ambassadura è vegnida accumpagnada da ses conjugal Eric LeVine e da Raphael Vogel, responsabel per fatschentas politicas ed economicas tar l'ambassada dals Stadis Unids. Suenter avair barattà ils salids èn stads sin il program in gentar cuminaivel sco er discussiuns davart temas d'interess vicendaivel.
Per la delegaziun da la regenza grischuna è la visita stada l'occasiun per render enconuschent a l'ambassadura dals Stadis Unids da l'America ed a ses accumpagnament anc meglier il chantun Grischun e sias relaziuns geograficas, economicas e politicas. Ina rolla speziala ha giugà qua la purschida turistica. Da l'autra vart èsi stà fitg captivant per la delegaziun da la regenza grischuna d'emprender d'enconuscher las valitaziuns da dunna ambassadura LeVine davart la Svizra e davart il Grischun sco er davart intginas dumondas geopoliticas en in ambient animà.
La regenza grischuna tgira annualmain contacts cun represchentantas e represchentants da stadis esters en Svizra. Quests discurs èn elements impurtants da las relaziuns dal chantun cun l'exteriur.
Fotografia agiuntada:
Raphael Vogel (Political & Economic Affairs da l'ambassada dals Stadis Unids), president da la regenza dr. Christian Rathgeb, conjugal Eric LeVine, ambassadura Suzan G. LeVine, cussegliera guvernativa Barbara Janom Steiner e chancelier Claudio Riesen (da sanestra).
Gremi: regenza
Funtauna: rg chanzlia chantunala dal Grischun