La regenza ha deliberà la missiva per ina revisiun totala da la lescha davart las stimaziuns uffizialas sco er la missiva per ina revisiun parziala da la lescha davart l'assicuranza d'edifizis dal Grischun per mauns dal cussegl grond. La finamira dals dus projects è quella da simplifitgar ils process e la collavuraziun tranter l'uffizi da stimaziun e l'assicuranza d'edifizis dal Grischun.
Il schaner 2014 ha la regenza dà l'incumbensa d'analisar la valitaziun da bains immobigliars tras l'uffizi da stimaziun (USt) ed il sectur d'assicuranzas da l'assicuranza d'edifizis dal Grischun (GVG) sco er da concepir l'entir sistem en moda pli effizienta e pli favuraivla. L'analisa ch'è alura vegnida fatga ha mussà il basegn d'agir correspundent. La part che pertutga la valitaziun da bains immobigliars vegn realisada a maun d'ina revisiun totala da la lescha davart las stimaziuns uffizialas. La part che pertutga l'assicuranza d'edifizis vegn prendida per mauns en moda parallela e coordinada en il rom d'ina revisiun parziala da la lescha davart l'assicuranza d'edifizis.
L'uffizi da stimaziun daventa l'uffizi per la valitaziun d'immobiglias
Cun coordinar pli fitg ils andaments dals manaschis cun l'assicuranza d'edifizis dal Grischun duain vegnir reducids ils custs da las stimaziuns a favur da tut las parts pertutgadas (chantun, vischnancas, assicuranza d'edifizis, proprietarias e proprietaris da chasas). La lescha duai survegnir il nov num lescha davart las valitaziuns uffizialas d'immobiglias. Il sboz da revisiun per la revisiun totala da la lescha davart las stimaziuns uffizialas cuntegna las suandantas finamiras ed ils suandants puncts essenzials:
- definir cleramain las incumbensas dal USt e pia sclerir ils puncts da colliaziun cun auters posts sco per exempel las vischnancas, l'assicuranza d'edifizis e l'administraziun da taglia;
- adattar il model dals custs e da las taxas resguardond pli fitg il princip da la cuvrida dals custs e da l'equivalenza;
- reducir l'obligaziun da valitaziun sin ils causals impurtants;
- accentuar l'obligaziun da cooperar da vart da las proprietarias e dals proprietaris, las obligaziuns concernent dar infurmaziuns da ed a l'uffizi;
- simplifitgar ils meds legals;
- sustegnair cleramain ina structura organisatorica decentrala;
- adattar las noziuns a la terminologia actuala ed adattar la sistematica da la lescha.
A partir da l'onn 2019 vegnan spetgads custs totals pli bass pervia da l'augment da l'effizienza. Per consequenza pon vegnir stritgadas previsiblamain var 8,5 plazzas.
La nova lescha davart l'assicuranza d'edifizis simplifitgescha ils process
L'assicuranza d'edifizis duai da nov pudair promover finanzialmain mesiras che vegnan realisadas voluntarmain vi d'edifizis existents e che han l'intent da proteger l'edifizi cunter donns elementars. Quests stimuls finanzials duain intimar las proprietarias ed ils proprietaris d'edifizis da realisar mesiras preventivas cunter donns elementars tar edifizis existents per uschia reducir il potenzial da donns. Qua tras duain capitar a lunga vista main donns e donns pli pitschens per che las premias da l'assicuranza d'edifizis dal Grischun tutgan er en l'avegnir tar las premias las pli bassas en Svizra. La revisiun parziala da la lescha davart l'assicuranza d'edifizis cuntegna plinavant ils suandants puncts centrals:
- las limitas per adattar la valur d'assicuranza en cas da midadas e da renovaziuns d'edifizis che augmentan la valur d'assicuranza senza valitaziun uffiziala vegnan auzadas;
- la pussaivladad da la GVG d'assicurar sin basa voluntara objects che sumeglian edifizis sco er edifizis ch'èn exclus da l'obligaziun d'avair in'assicuranza, vegn abolida;
- la disposiziun, tenor la quala edifizis d'alp, stallas sco er chamonas ch'èn situads ordaifer in vitg e che han ina distanza da passa 100 meters dal proxim edifizi che sto esser assicurà, n'èn betg assicurads, vegn abolida;
Il cussegl grond vegn a tractar ils dus projects en la sessiun da december 2016. La nova lescha davart las valitaziuns uffizialas d'immobiglias sco er la nova lescha davart l'assicuranza d'edifizis duain entrar en vigur il 1. da schaner 2018.
Infurmaziuns:
Revisiun totala da la lescha davart las stimaziuns uffizialas
cussegliera guvernativa Barbara Janom Steiner, scheffa dal departament da finanzas e vischnancas, tel. 081 257 32 01, e-mail
Barbara.Janom@dfg.gr.ch
Revisiun parziala da la lescha davart l'assicuranza d'edifizis
president da la regenza dr. Christian Rathgeb, schef dal departament da giustia, segirezza e sanadad, tel. 081 257 25 01, e-mail
Christian.Rathgeb@djsg.gr.ch
Gremi: regenza
Funtauna: rg chanzlia chantunala dal Grischun