Navigation

Inhaltsbereich

  • Erste Mitteilung
  • Neuen Beitrag einfügen
Ina delegaziun grischuna è sa scuntrada a Sondrio cun il prefect dr. Giuseppe Mario Scalia. L'object dal discurs è stada la collavuraziun en il sectur da migraziun.

La regenza observa cun gronda attenziun la situaziun en connex cun ils moviments da migraziun, spezialmain al cunfin sid dal Grischun. Actualmain datti mo singulas emprovas da cuntanscher il chantun Grischun sur la provinza da Sondrio ed i n'existan nagins indizis che questa situaziun vegnia a sa midar il proxim temp.
Per intensivar la collavuraziun tranter las autoritads dal chantun Grischun resp. dal corp da guardias da cunfin e las autoritads da la Lumbardia sin plaun politic ed operativ, han lieu regularmain scuntradas. Suenter la visita dal president da la regenza Christian Rathgeb a Sondrio l'onn passà, ha dacurt gì lieu là in'ulteriura scuntrada cun il prefect dr. Giuseppe Mario Scalia.
L'object dal discurs è stada tranter auter la coordinaziun da las activitads da patruglia per lung da las parts dal cunfin pertutgadas, en spezial tar ils passagis dal cunfin Piattamala e Castasegna per pudair reagir svelt er en cas che la situaziun sa midass. Ultra da quai è vegnì discutà davart in rinforz da la scolaziun cuminaivla. Da tuttas duas varts ha pudì vegnir constatada in gronda prontezza al dialog ed a la collavuraziun.
Las stentas actualas d'intensivar ils contacts vegnan coordinadas d'Alessandro Della Vedova per incumbensa dal departament da giustia, segirezza e sanadad.
Cun questa chaschun engrazia la regenza a las autoritads ed a las forzas polizialas da la Lumbardia per la collavuraziun quotidiana fitg buna a favur da la segirezza da la populaziun da tuttas duas varts dal cunfin.


Infurmaziuns:

president da la regenza Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch  


Gremi: departament da giustia, segirezza e sanadad
Funtauna: rg departament da giustia, segirezza e sanadad
Neuer Artikel