Navigaziun principala

Cuntegn da la pagina

Communicaziun da la regenza dals 20 d'october 2016

  • Erste Mitteilung
  • Neuen Beitrag einfügen
La regenza ha mess en vigur l'iniziativa da charvun cun ina revisiun parziala da la constituziun chantunala. Ultra da quai ha ella prolungà la cunvegna da prestaziun cun la centrala grischuna da dunnas ed approvà in project impurtant d'ovras da construcziun a Scuol.

Mess en vigur l'iniziativa da charvun
La regenza metta en vigur per il 1. da november 2016 la midada da la constituziun chantunala. La revisiun parziala da la constituziun chantunala è daventada necessaria, perquai che las votantas ed ils votants dal Grischun avevan acceptà ils 22 da settember 2013 l'iniziativa chantunala dal pievel "Gea ad electricitad netta senza forza electrica da charvun". L'uschenumnada iniziativa da charvun pretenda in confess cunter ovras electricas a charvun en la constituziun chantunala. Fixà vegn en spezial in scumond per interpresas cun participaziun chantunala da far investiziuns en talas ovras.

Link: Missiva da la regenza dals 26 d'avust 2014

L'exposiziun professiunala "Fiutscher" ha lieu gia per la 4. giada

L'uniun grischuna d'artisanadi e mastergn organisescha dals 9 fin ils 13 da november 2016 gia per la 4. giada l'exposiziun professiunala "Fiutscher". Er quest onn ha l'exposiziun che dura 5 dis lieu en la halla da la citad da Cuira. Per l'emprima giada porschan la cussegliaziun da professiun, da studi e da carriera (CPSC) ed il post spezialisà per l'integraziun visitas guidadas per persunas da lingua estra. Questa purschida duai facilitar l'access per persunas immigradas ad infurmaziuns davart la furmaziun e davart professiuns. Gia per la terza giada sa participescha er il post da stab per l'egualitad da las schanzas a l'exposiziun. Cun in agen stan preschenta quel quest onn ses project "Take your chance – per ina tscherna da professiun averta". En spezial ils giuvenils survegnan là infurmaziuns davart la tscherna da professiun averta ed atipica per las schlattainas. In ulteriur nov project lantschan quest onn l'uniun grischuna d'artisanadi e mastergn e l'uffizi per la furmaziun professiunal (UCFP). En las exposiziuns professiunalas d'enfin ussa èsi sa mussà che memia blers giuvenils visitan l'exposiziun senza avair finamiras concretas. Da l'autra vart crititgescha ina gronda part dals expositurs ch'ils giuvenils na sa preparian betg bain per l'exposiziun. Il project "identifitgar il profil da preferenzas" da l'uniun grischuna d'artisanadi e mastergn e dal UCFP duai optimar cleramain quest access. A maun d'in manual pon las visitadras ed ils visitaders identifitgar uschia lur preferenzas e cumbinar quellas cun eventuals profils professiunals.
La regenza garantescha maximalmain 255 000 francs vi dals custs totals da l'exposiziun dad 842 800 francs. Ultra da quai sa participeschan la confederaziun (208 758 francs) sco er ils expositurs, ils sponsurs e l'uniun grischuna d'artisanadi e mastergn (379 042 francs) vi da la "Fiutscher" 2016.

Link: Fegl sgulant da l'exposiziun professiunala "Fiutscher" 2016

Prolungaziun da la cunvegna da prestaziun cun la centrala grischuna da dunnas

La cussegliaziun giuridica dal post da stab per l'egualitad da las schanzas vegn – cun resalva da l'approvaziun dal credit tras il cussegl grond – surdada per ulteriurs 4 onns (2017‑2020) parzialmain a la centrala grischuna da dunnas. En il conclus da la regenza è previsa ina summa annuala da 25 000 francs per indemnisar la cussegliaziun giuridica correspundenta. Tenor la statistica han gì lieu l'onn 2015 427 discurs da cussegliaziun cun 128 persunas sco er 47 cussegliaziuns curtas.

Glisch verda per la protecziun cunter crudada da crappa e cunter lavinas a Scuol
La regenza ha approvà il project cunter crudada da crappa e cunter lavinas Magnacun. Per quest intent garantescha ella ina contribuziun da 75 pertschient u maximalmain 960 000 francs als custs subvenziunabels da radund 1,3 milliuns francs. Il project ha la finamira da garantir la protecziun da la via d'Engiadina. Quella è vegnida sutterrada 6 giadas ils ultims 30 onns. Perquai vegnan construidas raits cunter crudada da crappa (320 meters), raits da naiv (53 meters) e rempars da lavinas temporars (175 meters). Las lavurs da construcziun han lieu en duas etappas e duain vegnir terminadas l'onn 2017.

-
Las paraids da palissada existentas na satisfan betg pli a las pretensiuns da segirezza actualas.
© Uffizi da guaud e privels da la natira

Il traject da via tranter Valragn e Nufenen vegn curregì
La regenza ha approvà il project per la correcziun da la via taliana tranter Valragn e Nufenen. En il rom da la renovaziun totala planisada da la via naziunala N13, traject Valragn nord fin guaud da Cassana sid, duai vegnir renovada per il traffic local er ina part da la via parallela. Concretamain vegnan eliminads donns vi da la cuvrida, meglierà il trassé e renovà il sistem per allontanar l'aua.

-
Il traject da via (cotschen) d'ina lunghezza da circa 1 kilometer vegn renovà.
© Uffizi da construcziun bassa dal Grischun


Gremi: regenza
Funtauna: rg chanzlia chantunala dal Grischun
Neuer Artikel