Navigaziun principala

Cuntegn da la pagina

La cussegliera guvernativa Barbara Janom Steiner vegn onurada per ses engaschament a favur da las regiuns alpinas

  • Erste Mitteilung
  • Neuen Beitrag einfügen
La regenza dal Tirol ha onurà la cussegliera guvernativa Barbara Janom Steiner cun la "Evla tirolaisa". Questa distincziun vegn mintgamai surdada a Puntina a persunalitads ch'èn s'engaschadas per il bain dal Tirol.

En in pled festiv ha la regenza dal Tirol motivà sia distincziun suandantamain: Il zercladur 2012 han las regiuns alpinas deliberà a Bogn Ragaz in document d'iniziativa decisiv per ina strategia macroregiunala per il territori alpin. Ensemen cun ses partenaris da la cuminanza da lavur dals pajais da las Alps ARGE ALP è il chantun Grischun stà participà a l'elavuraziun dal document. Per la cussegliera guvernativa grischuna Barbara Janom Steiner era ed è questa strategia per las Alps ina schanza da prender per mauns en moda pli effectiva e sin basa colleghiala las sfidas cuminaivlas ensemen cun autras regiuns alpinas e cun auters stadis alpins e da nizzegiar meglier ils potenzials dal territori alpin.
L'onn 2015 ha la Cumissiun europeica, quest onn il Cussegl europeic acceptà la strategia europeica macroregiunala per las Alps, curt EUSALP. Cun quella è vegnì fatg in pass decisiv per l'avegnir dals pajais da las Alps. La strategia macroregiunala per il territori alpin duai promover ina creschientscha intelligenta, ecologica, raschunaivla e socialmain gista da quest spazi central europeic. La finamira centrala è quella da garantir a lunga vista e da sviluppar vinavant las Alps sco spazi da viver ed economic attractiv per la populaziun indigena ed er sco regiun turistica da renum mundial.

Resumond constatescha la regenza tirolaisa che la cussegliera guvernativa Barbara Janom Steiner haja demussà ina gronda responsabladad per quests temas che sajan d'in interess spezial per ils pajais da las Alps. Ils ultims onns haja ella agì sco motor ferm e permanent da EUSALP. Questa prestaziun extraordinaria vegn onurada cun la "Evla tirolaisa" en aur.

Fotografia agiuntada:
-
©Die Fotografen/Land Tirol
Il guvernatur dal Tirol Günther Platter (a sanestra) ed il president dal parlament Herwig van Staa (a dretga) surdattan a la cussegliera guvernativa grischuna Barbara Janom Steiner la "Evla tirolaisa" en aur


Infurmaziuns:
Cussegliera guvernativa Barbara Janom Steiner, scheffa dal departament da finanzas e vischnancas, tel. 081 257 32 01, e-mail: Barbara.Janom@dfg.gr.ch


Gremi: departament da finanzas e vischnancas
Funtauna: rg departament da finanzas e vischnancas
Neuer Artikel