Sustegn finanzial per il mantegniment da la trilinguitad
La confederaziun conceda al chantun agids finanzials per mantegnair la lingua e cultura rumantscha e taliana sco er per promover la trilinguitad. La regenza ha approvà ina cunvegna da prestaziun correspundenta cun l'uffizi federal da cultura per la perioda 2017–2020. Per questa durada prevesa la cunvegna contribuziuns federalas da totalmain circa 21,2 milliuns francs. Cun quests daners sto il chantun prender mesiras per mantegnair e per promover la lingua e cultura rumantscha e taliana, sustegnair organisaziuns ed instituziuns correspundentas, promover las activitads editorialas rumantschas e dar agids finanzials per mantegnair e per promover il rumantsch en las medias.
Per la perioda 2017–2018 èsi ultra da quai previs che l'agid finanzial da l'uffizi federal da cultura al chantun Grischun vegnia giuditgà e valità da vart externa. Uschia duai vegnir examinadà l'effect da las mesiras dal chantun, las prestaziuns da las organisaziuns ed eventualas midadas per la proxima perioda. Questa evaluaziun cumpiglia las organisaziuns linguisticas Lia rumantscha e Pro Grigioni italiano sco er l'Agentura da novitads rumantscha e las atgnas mesiras dal chantun per mantegnair e per promover las linguas chantunalas.
Ulteriuras infurmaziuns davart la situaziun linguistica en il Grischun
Novas prescripziuns per la pestga en il Grischun
La regenza ha approvà la revisiun da las prescripziuns chantunalas da pestga che cuntegna quatter adattaziuns impurtantas. In da quellas pertutga il Rain alpin ch'è in'aua da pestga stimada sin tut sia lunghezza. Ils chantuns Grischun e Son Gagl ed ils pajais cunfinants Liechtenstein e Vorarlberg tgiran ina stretga collavuraziun en quai che pertutga la statistica dals peschs pigliads e la derasaziun da peschs. Las novas disposiziuns servan ad unifitgar er il pestgar. Las midadas ch'èn decisivas per il Grischun concernan en spezial la durada da la stagiun da pestga e la protecziun da la litgiva da lai. Uschia vegn la pestga en il Rain alpin prolungada per 2 emnas fin e cun ils 30 da settember. Plinavant vegn introducida ina limita da schanetg da 50 centimeters per la litgiva da lai.
Las novas disposiziuns concernan plinavant la pestga en la Landquart. Là vegn la stagiun da pestga averta gia il 1. da favrer e betg pir il 1. da matg, e quai pervia da l'aua ch'è per gronda part turbla la primavaira. Ultra da quai vegn introducida tras la revisiun da las prescripziuns da manaschi ina reducziun dal dumber dals peschs ch'ins dastga pigliar per di en l'En. Ils buns success da pestga da salmonids n'èn betg garantids en il flum da vallada dal chantun, nua ch'i vegn pestgà il pli savens. Perquai vegn il dumber da salmonids ch'ins dastga pigliar per di reducì da 6 a 4 a partir da la stagiun da pestga 2017.
La quarta disposiziun impurtanta pertutga la pestga intensiva dal salmelin canadais en ils lais da l'Engiadin'ota. Quest pesch da rapina smanatscha dapi var 10 onns la preda da salmelins da lai. Cun abolir la limita da lunghezza e dal dumber da salmelins canadais che dastgan vegnir pigliads spera la pestga grischuna ch'i dettia in svilup positiv en quest reguard en ils lais da l'Engiadin'ota.
En il lai da Silvaplauna po il salmelin canadais vegnir piglià ussa senza restricziuns.
Gremi: regenza
Funtauna: rg chanzlia chantunala dal Grischun