Il nov video da la chanzlia chantunala mussa che 20 mattas han lavurà ier plain iniziativa. Il di naziunal da l'avegnir èn ellas stadas engaschadas sco puras al Plantahof a Landquart.

Puras han ina professiun multifara. Ellas èn savens a l'aria frestga e tegnan animals u cultiveschan verdura, graun e fritgs. Durant la scolaziun emprendan ellas bler davart plantas ed animals, ma er davart maschinas agriculas ed apparats tecnics.

20 mattas dals chantuns Grischun e Glaruna èn ier vegnidas a savair d'emprim maun tge che quai vul dir dad esser pura. Durant in di han ellas lavurà en questa professiun captivanta e multifara. Sco ch'il nov video da la chanzlia chantunala mussa, steva dentant oravant tut il plaschair en il center.


Infurmaziuns:
Seraina Hartmann, magistra spezialisada per economia da manaschi, center da furmaziun e cussegliaziun agricula Plantahof, tel. 081 257 60 35, e-mail Seraina.Hartmann@plantahof.gr.ch


Gremi: center da furmaziun e cussegliaziun agricula Plantahof
Funtauna: rg center da furmaziun e cussegliaziun agricula Plantahof