Cun ina roadshow demonstrescha l'uffizi d'energia e da traffic dal Grischun l'effect ed il confort d'ina isolaziun termica. Duas chasettas, tuttas duas stgaudadas cun ina chandaila, mussan quai en moda visibla e chapaivla. L'effect da l'isolaziun termica vegn visualisà tras l'indicaziun da la temperatura interna. Glindesdi proxim ha lieu la partenza da la terza tura da quest gener.

La strategia d'energia 2050 da la confederaziun e dals chantuns cumpiglia principalmain trais secturs: la sortida da l'energia nucleara, la promoziun d'energias regenerablas e l'effizienza energetica. L'effizienza energetica da sia vart cuntegna cunzunt la sanaziun termica d'edifizis existents. Il project "Isolar gida a stgaudar" duai promover quest sectur parzial da la vieuta energetica ed er auzar la quota da sanaziuns d'edifizis existents. Ultra da quai vegn la populaziun a savair che chasas isoladas bain han blers avantatgs: damain custs d'energia, dapli confort, meglras pussaivladads da dar en locaziun l'object, e la valur da la chasa tegna pli ditg. Plinavant vegnan schanegiadas las resursas, ed il clima vegn protegì en moda duraivla.

Il project – la demonstraziun – las infurmaziuns
Durant il temp d'enviern vegnan ils dus differents objects a mussar che la chasetta veglia cuntanscha mo ina temperatura modesta, entant che la chasetta sanada ha ina temperatura interna agreabla. Las duas chasettas restan mintgamai in'emna en il medem lieu. A chaschun d'ina occurrenza iniziala vegnan explitgads ils programs da promoziun existents ed il proceder per sanar in edifizi.

Programs da promoziun
Il chantun Grischun dispona d'ina vasta paletta per promover edifizis existents. Ils programs da promoziun remunereschan proprietarias e proprietaris innovativs che renoveschan lur immobiglias. Il program d'edifizis naziunal sustegna finanzialmain parts dals mirs exteriurs dals edifizis. Il chantun Grischun promova sanaziuns cumplettas sin basa da las pretensiuns dal program d'edifizis naziunal. Plinavant vegnan promovids indrizs da la tecnica da chasa en edifizis existents (implants solars, stgaudaments da laina, indrizs da pumpa a chalur e.u.v) per trair a niz las energias regenerablas. Fin il december 2016 promova il chantun Grischun plinavant sanaziuns da Minergie sco er remplazzaments d'indrizs d'illuminaziun en edifizis existents betg duvrads per abitar. Quai en il rom d'ina acziun da promoziun da durada limitada.

Infurmaziuns detagliadas èn disponiblas sin las suandantas paginas d'internet:
www.dasgebaeudeprogramm.ch program d'edifizis naziunal)
www.aev.gr.ch/ee/beitraege (chantun Grischun)

Plan da mesiras per l'igiena da l'aria
Suenter ina sanaziun termica d'edifizis dovran ils stgaudaments pli pauc carburant. Cunzunt stgaudaments da laina pli vegls emettan bleras substanzas nuschaivlas en l'aria, sco pulvra fina e fulin. En il plan da mesiras per l'igiena da l'aria èn fixadas mesiras per reducir questas substanzas nuschaivlas en l'aria. Questas mesiras vegnan realisadas tras l'uffizi per la natira e l'ambient (UNA). Stgaudaments da laina pitschens vegnan per exempel inspectads periodicamain tras il controllader da stgaudaments. En il Mesauc dovri mesiras localas supplementaras per reducir la concentraziun da pulvra fina. Ils proxims onns duessan vegnir sanads là stgaudaments da laina vegls. La populaziun ha ultra da quai la pussaivladad da sa laschar cussegliar en dumondas d'igiena da l'aria e d'energia.

Infurmaziuns detagliadas èn disponiblas sin las suandantas paginas d'internet:
www.mesolcina-aria.ch (plan da mesiras per l'igiena da l'aria en il Mesauc)
www.anu.gr.ch (chantun Grischun)

"Isolar gida a stgaudar" – las staziuns 2016/2017 (midadas restan resalvadas)

• Cuira, fiera da Nadal: glindesdi, ils 21 da november, fin glindesdi, ils 28 da november 2016
• San Vittore, Palestra: glindesdi, ils 28 da november, fin glindesdi, ils 5 da december 2016
• Grono, Paese: glindesdi, ils 5 da december, fin glindesdi, ils 12 da december 2016
• Favugn: glindesdi, ils 6 da favrer, fin glindesdi, ils 13 da favrer 2017

Fotografia:

Las duas chasettas da model (a sanestra la chasetta veglia, a dretga la chasetta sanada) demonstreschan en moda visibla e chapaivla l'effect ed il confort d'ina isolaziun termica


Infurmaziuns:
- Barthli Schrofer, manader da project "effizienza energetica", uffizi d'energia e da traffic, tel. 081 257 36 30, e-mail Barthli.Schrofer@aev.gr.ch
- Hanspeter Lötscher, referendari "igiena da l'aria", uffizi per la natira e l'ambient, tel. 081 257 29 96, e-mail Hanspeter.Loetscher@anu.gr.ch


Gremi: uffizi d'energia e da traffic
Funtauna: rg uffizi d'energia e da traffic