Sin invit da la regenza ha l'ambassadura slovaca, Andrea Elscheková Matisová, visità oz il chantun Grischun.

L'ambassadura da la Republica Slovaca Andrea Elscheková Matisová è vegnida beneventada oz en la chasa grischa a Cuira dal president da la regenza Christian Rathgeb e dal chancelier Claudio Riesen. L'ambassadura è vegnida accumpagnada da la cussegliadra da l'ambassada Sona Budayova. Suenter il barat dals salids uffizials è in gentar cuminaivel stà sin il program.

La regenza grischuna tgira annualmain contacts cun represchentantas e represchentants da stadis esters en Svizra. Quests discurs èn elements impurtants da las relaziuns dal chantun cun l'exteriur. Cun ils stadis vischins e cun pajais che han relaziuns spezialas cun la Svizra e cun il Grischun vegnan savens discutadas dumondas specificas actualas. Autras visitas servan en emprima lingia a barattar experientschas sin il champ cultural, economic e politic.

Fotografia:

L'ambassadura Andrea Elscheková Matisová (segunda da sanestra), accumpagnada da la cussegliadra d'ambassada Sona Budayova, vegn beneventada en la chasa grischa dal president da la regenza Christian Rathgeb (a sanestra) sco er dal chancelier Claudio Riesen (a dretga).


Gremi: regenza
Funtauna: rg chanzlia chantunala dal Grischun