Navigation

Inhaltsbereich

  • Erste Mitteilung
  • Neuen Beitrag einfügen
La regenza ha inoltrà il dossier da candidatura per ils gieus olimpics 2026, relaschà la serrada dal spazi d'aria a San Murezzan e deliberà ina contribuziun per in film da kino.

Inoltrà la candidatura per Olimpia 2026
La regenza ha inoltrà il dossier da candidatura "Gieus olimpics e paralimpics d'enviern 2026 Grischun e partenaris" a Swiss olympic. Il proxim term impurtant è l'inscunter cun l'usche-numnada task force da Swiss olympic il favrer 2017. Questa task force è cumpetenta per l'entira procedura sco er per concepir il rapport d'evaluaziun da tut las candidaturas svizras. En vista a quest inscunter vegn la regenza a sclerir differentas dumondas ed ad examinar eventualas optimaziuns ed alternativas. Quai per exempel areguard ils lieus d'organisaziun dal patinadi da sveltezza u dal hockey sin glatsch. En il center stat dentant la votaziun dal pievel dals 12 da favrer 2017. A chaschun da questa votaziun pon las Grischunas ed ils Grischuns s'exprimer davart la candidatura e davart in credit d'impegn brut correspundent da 25 milliuns francs. Il project survegniss uschia ina legitimaziun democratica cun grond sustegn ed ils meds finanzials ch'èn necessaris per la candidatura fin ch'il comité internaziunal olimpic decida davart la surdada il fanadur 2019.

Las dronas ston restar per terra durant ils campiunadis mundials da skis
La regenza relascha ina serrada dal spazi d'aria per helicopters da model, aviuns da model e dronas durant ils campiunadis mundials da skis alpin a San Murezzan. La serrada vala per il spazi d'aria da San Murezzan e da Zuoz. Ils campiunadis mundials da skis èn ina da las occurrenzas da sport las pli grondas sin plaun internaziunal. Perquai stoi vegnir fatg quint cun dapli sgols en il spazi d'aria enturn San Murezzan e la plazza aviatica da Samedan durant la realisaziun. Plinavant vegn questa occurrenza ad avair grond interess en las medias. Pervia da quai vegnan las represchentantas ed ils represchentants da las medias sco er persunas privatas a far pli e pli registraziuns visualas cun dronas. Tals objects sgulants en l'aria pon periclitar considerablamain las sportistas ed ils sportists, ils giasts, las aspectaturas ed ils aspectaturs sco er il traffic aviatic local. Per garantir la segirezza da l'occurrenza resta il spazi aviatic serrà da glindesdi, ils 6 da favrer 2017 (08.00) fin dumengia, ils 19 da favrer 2017 (24.00) per objects sgulants fin ad in pais total da 30 kilograms.

-

Contribuziun a la registraziun d'in roman grischun sin film
La regenza ha concedì ina contribuziun da 150 000 francs per realisar il film da kino "1821 – Dunkelheit in den Bergen". Tar quest project da film da la firma da producziun snakefilm ScRL sa tracti da la registraziun sin film dal roman cun il medem num da l'autur grischun Silvio Huonder. L'istorgia dal film sa basa sin circumstanzas vairas sco ch'ellas sa preschentavan l'onn 1821 en il Grischun. Ultra d'in cas criminal tracta il film er l'istorgia davart il svilup d'in urden giuridic democratic anc avant che la Svizra è daventada in stadi federal l'onn 1848. Filmà vegni en las giassas da Cuira, a Glion, a Versomi, en la Val Bargis e Val Stussavgia, en Val Lumnezia fin en la regiun da Vuorz.

-
©snakefilm ScRL

Posiziun tar la petiziun dal 2. parlament da mattas dal Grischun
La regenza ha beneventà la discussiun dal 2. parlament da mattas davart la dumonda actuala da la collocaziun e da l'assistenza da persunas minorennas betg accumpagnadas ed ha prendì posiziun tar la petiziun inoltrada.
Recepir in uffant da tgira è ina sfida per ina famiglia. Pervia da las bleras obligaziuns en chaussa dovri ina procedura da permissiun cumplessiva. Ils uffants da tgira èn savens uffants che han fatg experientschas da vita difficilas. Els èn vegnids negligids, maltractads, violads u han fatg tras bleras separaziuns. Questas experientschas transmettan els er sin la nova situaziun da vita en la famiglia da tgira. Emprimas experientschas cun persunas minorennas betg accumpagnadas en famiglias da tgira mussan che la lavur d'assistenza supplementara per ils geniturs da tgira e per il post spezialisà involvì per ils uffants da tgira da l'uffizi dal servetsch social è fitg gronda. Ils geniturs da tgira ston esser conscients dal grond basegn d'engaschament temporal e persunal. Uschiglio pon vegnir interruttas relaziuns da tgira. Per las persunas minorennas betg accumpagnadas vul quai dir ch'ellas perdan puspè las structuras e las relaziuns stabilas, fidadas e calculablas. Las famiglias da tgira n'èn perquai betg en tut ils cas ina buna furma da collocaziun individuala. Accumpagnar pass per pass ils giuvenils en l'independenza en las differentas furmas d'abitar è savens pli cunvegnent che la collocaziun en ina famiglia da tgira.

Petiziun: "Plazzar requirentas e requirents d'asil minorens betg accumpagnads en famiglias ospitantas"

Nova senda e via da velos tranter Flem e Laax
La regenza ha approvà la construcziun d'ina colliaziun da senda e via da velos per lung da la via sursilvana a Flem e Laax e concedì per quest intent ina contribuziun chantunala da maximalmain 530 000 francs. La situaziun actuala sin il traject tranter Flem e Laax n'è betg cuntentaivla per pedunas e peduns sco er per ciclistas e ciclists. Las duas vischnancas vulan perquai stgaffir ina colliaziun da traffic betg motorisà attractiva cun la construcziun d'in senda e d'ina via da velos ch'èn separadas da las ulteriuras vias. La senda cumbinada cun ina via da velos augmenta considerablamain la segirezza da las ciclistas e dals ciclists sco er da las pedunas e dals peduns e meglierescha las relaziuns da traffic sin quest traject da via.

-

Projects da votaziun dals 12 da favrer 2017
La regenza ha prendì enconuschientscha dal fatg ch'ils suandants projects federals vegnan suttamess a la votaziun dal pievel la dumengia dals 12 da favrer 2017:
- conclus federal dals 30 da settember 2016 davart la natiralisaziun facilitada da persunas estras da la terza generaziun
- conclus federal dals 30 da settember 2016 davart la creaziun d'in fond per las vias naziunalas ed il traffic d'aglomeraziun
- lescha federala dals 17 da zercladur 2016 davart mesiras fiscalas per rinforzar la cumpetitivitad da la Svizra sco lieu d'interpresas (lescha davart la refurma da la taglia sin interpresas III)

Il medem di vegni er votà davart il suandant project chantunal:
- conclus dal cussegl grond dals 6 da december 2016 concernent la concessiun d'in credit d'impegn brut da 25 milliuns francs per la candidatura per ils gieus olimpics e paralimpics d'enviern 2026


Gremi: regenza
Funtauna: rg chanzlia chantunala dal Grischun
Neuer Artikel