La strategia d'energia 2050 vul dapli effizienza energetica ed energias regenerablas en il sectur dals edifizis. Per sanar ils mirs exteriurs d'edifizis survegn ins cleramain dapli daners da promoziun a partir da l'onn 2017 en il Grischun. Ils avantatgs d'ina tala sanaziun vegnan mussads en in nov video da la chanzlia chantunala.

L'effizienza energetica d'edifizis existents vegn meglierada cunzunt tras sanaziuns termicas. Il program naziunal d'edifizis, che promova dapi l'onn 2010 unitarmain sanaziuns dals mirs exteriurs d'edifizis, vegn surdà als chantuns. Qua tras vegn il chantun Grischun a pudair remunerar a partir dal 1. da schaner 2017 pli fitg che fin ussa proprietarias e proprietaris innovativs che renoveschan lur immobiglias. Parts da l'edifizi che chaschunan gronds custs, sco la fatschada u il tetg, vegnan sustegnidas da nov cun 60 francs per meter quadrat (fin ussa 30 francs).

Bonus supplementar per sanaziuns totalas
Sche edifizis vegnan sanads cumplessivamain, paja il chantun in bonus per la sanaziun totala. Quel pertutga la promoziun per l'isolaziun termica da la fatschada e dal tetg, da la paraid e dal funs cunter il terren. Las surfatschas da questas parts da l'edifizi vegnan promovidas cun il dubel da la contribuziun. Plinavant vegnan promovids indrizs da la tecnica da chasa en edifizis existents (implants solars, stgaudaments da laina, indrizs da pumpa a chalur e.u.v.) per trair a niz las energias regenerablas. En il rom da l'armonisaziun dals models da promoziun per tut ils chantuns vegnan adattadas las cundiziuns sco er las calculaziuns da las contribuziuns. Infurmaziuns detagliadas davart ils programs da promoziun stattan a disposiziun a partir dal 1. da schaner 2017 sut www.energie.gr.ch.

La preparaziun vala la paina
En cas d'ina sanaziun d'in edifizi vali la paina da planisar detagliadamain e da s'infurmar a temp davart ils meds da promoziun. Suenter avair survegnì la garanzia da contribuziun poi vegnir cumenzà cun la sanaziun. Da nov vala per tut las mesiras, pia er per sanaziuns parzialas dals mirs exteriurs da l'edifizi, il princip dad "avair la garanzia da contribuziun avant che cumenzar cun las lavurs". Ultra da la purschida da cussegliaziun da l'uffizi d'energia e da traffic han lieu differentas occurrenzas d'infurmaziun.

Isolar gida a stgaudar
Er la terza ediziun da la roadshow "Isolar gida a stgaudar" mussa danovamain en moda simpla e chapibla l'impurtanza da l'effizienza energetica d'edifizis. La roadshow preschenta a la populaziun tut ils avantatgs da chasas isoladas bain: damain custs d'energia, dapli confort, meglras pussaivladads da dar en locaziun l'object, e la valur da la chasa tegna pli ditg. Il nov video da la chanzlia chantunala cun il titel "Isolar gida a stgaudar" conferma quai en moda illustrativa a maun da dus projects da sanaziun en il Grischun.

Infurmaziuns detagliadas èn disponiblas a partir dal schaner 2017 sin las suandantas paginas d'internet:
www.energie.gr.ch (portal da promoziun)
www.aev.gr.ch (uffizi d'energia e da traffic)

Dapli infurmaziuns a l'apero d'energia:

 Infurmaziuns:
- Erich Büsser, manader da l'uffizi d'energia e da traffic, tel. 081 257 36 21, e-mail Erich.Buesser@aev.gr.ch
- Andrea Lötscher, manader da la partiziun per l'effizienza da l'energia, uffizi d'energia e da traffic, tel. 081 257 36 30, e-mail Andrea.Loetscher@aev.gr.ch


Gremi: uffizi d'energia e da traffic
Funtauna: rg uffizi d'energia e da traffic