Cuntegn da la pagina

Substanzas nuschaivlas da lavurs da construcziun en la part sura dal Spöl

  • Erste Mitteilung
  • Neuen Beitrag einfügen
L'uffizi per la natira e l'ambient ha cumprovà en il Spöl substanzas nuschaivlas che derivan da lavurs da construcziun. Ina campagna da mesiraziun ha mussà che lavurs da sanaziun vi da l'implant d'accumulaziun Punt dal Gall èn la raschun per quai.

Il cumenzament da november 2016 han las Ovras electricas d'Engiadina SA (OEE) constatà en il Spöl sut l'implant d'accumulaziun Punt dal Gall valurs pli autas da las substanzas nuschaivlas "bifenils policlorads" (PCB) e fatg ina denunzia a la polizia (communicaziun a las medias da la polizia chantunala dals 4 da november 2016). Sin quai è vegnida lantschada ina campagna da mesiraziun voluminusa tranter il lai d'accumulaziun Livigno e Martina sut la direcziun da l'uffizi chantunal per la natira e l'ambient. Ils resultats da questa campagna èn ussa avant maun.

Sin il traject dal Spöl tranter l'implant d'accumulaziun Punt dal Gall e la sbuccada da l'Ova dal Fuorn èn vegnidas mesiradas valurs pli autas da PCB en ils sediments da l'aual, en ils peschs sco er en las algas ed en ils mistgels dal letg da l'aual. Las substanzas nuschaivlas cumprovadas derivan da las lavurs da sanaziun che han gì lieu l'atun 2016 al scul da basa da l'implant d'accumulaziun Punt dal Gall. La polizia investighescha, tgi ch'è responsabel per questa contaminaziun dal Spöl.

En las ulteriuras auas controlladas, en spezial en ils dus lais d'accumulaziun Punt dal Gall ed Ova Spin sco er en l'En, n'èn vegnidas constatadas naginas concentraziuns pli autas da substanzas nuschaivlas.

Sin basa dals resultats da las analisas, ch'èn ussa avant maun tar l'uffizi per la natira e l'ambient, exista ina periclitaziun a media ed a lunga vista per la flora e la fauna sin il traject dal Spöl pertutgà, perquai ch'ils PCB na vegnan strusch decumponids biologicamain e s'accumuleschan en la chadaina da nutriment. En accordanza cun differents spezialists e represchentants dal parc naziunal examinescha l'uffizi per la natira e l'ambient perquai mesiras che duain eventualmain vegnir instradadas per reducir la contaminaziun da substanzas nuschaivlas.

Fotografia:
-



Infurmaziuns:

- Daniel Güttinger, substitut dal manader da l'uffizi per la natira e l'ambient, tel . 081 257 29 54, e-mail Daniel.Guettinger@anu.gr.ch
- Michael Roth, directur da las Ovras electricas d'Engiadina SA, tel. 079 260 18 65, e-mail Michael.Roth@ekwstrom.ch
- Hans Lozza, Parc Naziunal Svizzer, tel. 081 851 41 11, e-mail Lozza@nationalpark.ch


Gremi: uffizi per la natira e l'ambient
Funtauna: rg uffizi per la natira e l'ambient

Neuer Artikel