Zum Seiteninhalt

Andreas Walser: Ed ussa – vom jau

  • Erste Mitteilung
  • Neuen Beitrag einfügen
Andreas Walser (1908 – 1930) è ina persunalitad extraordinaria en il mund grischun da l'art e da la cultura. In video da la chanzlia chantunala mussa, co che la nova exposiziun speziala dal museum d'art dal Grischun avra novas vias vers quest artist excepziunal ch'è mort baud.

Creschì si sco figl d'in reverenda en la citad da Cuira, è Andreas Walser emigrà cun 20 onns en la metropola d'art Paris. Tenor sias atgnas indicaziuns vuleva el "daventar dal tuttafatg Franzos". A Paris ha el chattà svelt contact, ha emprendì d'enconuscher Pablo Picasso, Jean Cocteau, Klaus Mann ed autras persunalitads da la scena d'art e da litteratura. El ha lavurà sco in nar, savens sut l'influenza da drogas, ed ha prest pudì mussar intginas ovras en exposiziuns. E tuttina turnava el adina puspè en il Grischun, tar ses amis da giuventetgna e tar ses ami patern ed exemplaric Ernst Ludwig Kirchner.

L'exposiziun ch'è vegnida concepida ensemen cun la musicista Vera Kappeler vuless avrir novas vias vers quest artist da Cuira. L'ovra artistica dad Andreas Walser è – malgrà sia curta fasa creativa – fitg voluminusa. L'exposiziun dat ina survista da las ovras e da las gruppas d'ovras las pli impurtantas e tematisescha differents puncts centrals. L'enconuschent decoratur da tribuna grischun Duri Bischoff ornescha il laboratori al 1. plaun sura da l'edifizi nov cun installaziuns davart las situaziuns da vita dad Andreas Walser. Questas "culissas", illuminadas dal tecnicist d'illuminaziuns Roger Stieger, accumpognan l'exposiziun sco er differents programs musicals-poetics cun musicistas e musicists sco er cun acturas ed acturs tschernids, cun commembras e commembers dal Teater giuven grischun (TGG) e cun scolaras e scolars da la scola chantunala grischuna Cuira.

Il video da la chanzlia chantunala dat ina curta invista biografica da la vita dad Andreas Walser e mussa ils puncts culminants da l'exposiziun speziala dal museum d'art.

Vernissascha
venderdi, ils 10 da favrer 2017, a las 18.00

Exposiziun
dals 11 da favrer fin ils 16 da fanadur 2017
mardi fin dumengia, da las 10.00 fin las 17.00


Infurmaziuns:
Stephan Kunz , directur dal museum d'art dal Grischun, tel. 081 257 28 68, e-mail Stephan.Kunz@bkm.gr.ch


Gremi: uffizi da cultura
Funtauna: rg uffizi da cultura
 
Neuer Artikel