Zum Seiteninhalt

Nagina candidatura per ils gieus olimpics Grischun & partenaris 2026

  • Erste Mitteilung
  • Neuen Beitrag einfügen
Il chantun Grischun na vegn betg ad elavurar ina candidatura per ils gieus olimpics e paralimpics d'enviern 2026. Las votantas ed ils votants han refusà cun 60,1 pertschient na cunter 39,9 pertschient gea in credit d'impegn correspundent. La regenza deplorescha la decisiun: Scleriments detagliads da las consequenzas da gieus olimpics e paralimpics d'enviern per il chantun en il rom da l'elavuraziun d'ina candidatura èn pia daventads obsolets.

Il sport d'enviern resta in element da purschida decisiv per il chantun Grischun sco destinaziun da vacanzas e da temp liber, dentant er sco chantun d'abitar e sco spazi da viver. Occurrenzas da sport pon sviluppar ina gronda attracziun publica e gidan a prestar bler per la commerzialisaziun da la destinaziun turistica sco er per l'entusiassem da la populaziun per il sport. Er per il svilup current da l'infrastructura da turissem, da sport, da traffic sco er da la tecnologia d'infurmaziun e da communicaziun pon ellas esser ina contribuziun decisiva. La regenza vegn perquai er en il futur ad examinar projects per occurrenzas da sport en il chantun ed eventualmain a sustegnair quels.

Malgrà las differentas opiniuns davart ina candidatura per ils gieus olimpics han tant ils adversaris sco er ils aderents adina puspè accentuà la necessitad d'exprimer novas ideas e da dar novs impuls al Grischun sco chantun da turissem. La regenza appellescha a las differentas forzas politicas, a las differentas federaziuns ed als differents furniturs da prestaziuns da cuntinuar cun la discussiun cumenzada en ina moda e maniera constructiva e da lavurar cuminaivlamain vi da models futurs dal turissem e dal sport en il Grischun. La regenza vegn a sustegnair activamain in tal process en il rom da sias intenziuns strategicas tenor il program da la regenza.

Ils gieus olimpics e paralimpics 2026 restan in tema en Svizra. En il rom d'ina candidatura "Sion 2026" daventassan San Murezzan e Schlarigna, cun lur pista olimpica da bob, lieus da concurrenza per las concurrenzas da bob, da scarsola e da skeleton. La regenza sustegna quest project e giavischa bun success a la candidatura "Sion 2026".


Infurmaziuns:
Cusseglier guvernativ dr. Jon Domenic Parolini, schef dal departament d'economia publica e fatgs socials, tel. 081 257 23 01, e-mail Jondomenic.Parolini@dvs.gr.ch


Gremi: regenza
Funtauna: rg departament d'economia publica e fatgs socials
Neuer Artikel