Zum Seiteninhalt

La regenza deliberescha la missiva tar la revisiun totala da la lescha chantunala dal dretg da burgais

  • Erste Mitteilung
  • Neuen Beitrag einfügen
La regenza grischuna ha deliberà la missiva tar la revisiun totala da la lescha chantunala dal dretg da burgais per mauns dal cussegl grond. La lescha chantunala dal dretg da burgais duai vegnir adattada al dretg federal revedì ed als basegns che resultan da la pratica giuridica.

Il 1. da schaner 2018 vegn ad entrar en vigur la revisiun totala da la lescha federala davart il dretg da burgais svizzer. Pervia da questa revisiun èsi necessari d'adattar la lescha chantunala dal dretg da burgais che regla l'acquist e la perdita dal dretg da burgais chantunal e communal. La realisaziun permetta da concepir la lescha chantunala dal dretg da burgais en ina moda pli survesaivla. Pervia da la nova structura dovri ina revisiun totala.

Per ina natiralisaziun pretenda il dretg federal revedì da nov ina permissiun da domicil sco er enconuschientschas linguisticas en scrit d'ina lingua naziunala. Questas premissas pli severas da la confederaziun vegnan integradas en la lescha chantunala. Plinavant sto vegnir resguardada en il dretg chantunal l'armonisaziun dals termins da domicil chantunals e communals, ch'è vegnida introducida da la confederaziun. En il chantun Grischun chaschuna quai ina reducziun per part marcanta da la durada minimala da la dimora che valeva fin ussa en la vischnanca da natiralisaziun. Cun la revisiun vegni ultra da quai profità da l'occasiun per tegnair quint da differents basegns da la pratica giuridica. Per exempel duain Svizras e Svizzers che vulan daventar Grischunas e Grischuns stuair ademplir premissas da qualificaziun main severas che candidatas e candidats esters. La finala vegni tegnì quint da differents giavischs da la consultaziun. In da quels pertutga il dretg da burgais suenter fusiuns da vischnancas. En vischnancas fusiunadas sa drizza il dretg da burgais tenor la vischnanca politica. Uschia sa mida il dretg da burgais per ina part da las burgaisas e dals burgais d'ina vischnanca fusiunada da nov. Questas burgaisas e quests burgais duain survegnir da nov la pussaivladad d'agiuntar al nov dretg da burgais ina remartga davart il dretg da burgais avant la fusiun. La remartga n'è betg giuridicamain lianta e na stabilescha betg in nov lieu d'origin che resultass or da la cumbinaziun dal dretg da burgais vegl e nov.

Il cussegl grond vegn a tractar questa fatschenta en la sessiun da zercladur 2017. Las midadas duain entrar en vigur il 1. da schaner 2018.

Agiunta
Missiva


Infurmaziuns:
cusseglier guvernativ Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch  


Gremi: regenza
Funtauna: rg chanzlia chantunala dal Grischun
Neuer Artikel