Ils 18 d'avrigl cumenza l'Agentura telegrafica svizra (ats) cun il servetsch regiunal per il Grischun talian. L'agentura da novitads naziunala installescha quest servetsch per incumbensa dal chantun Grischun. El vegn mess a disposiziun gratuitamain a tut las medias da lingua taliana dal chantun.

Cun ses servetschs da basa en tudestg, franzos e talian vul la ats promover gia da vegl ennà il barat tranter las regiuns linguisticas. Ultra da quai rapporta ella en ils servetschs regiunals dentant er or da las regiuns per las regiuns respectivas. Fin ussa fascheva ella quai mo per tudestg e franzos. Ussa vegn lantschà l'emprim servetsch regiunal da lingua taliana en il Grischun.

Quest servetsch regiunal vegn pussibilità tras daners da la promoziun da linguas da la confederaziun e dal chantun Grischun. Resultà è el sin basa d'ina incumbensa parlamentara che vuleva ch'il chantun rinforzia la coesiun sociala cun promover l'infurmaziun tranter las cuminanzas linguisticas. Tras il nov servetsch vegn ademplida questa incumbensa.

Cun questa purschida vul la regenza grischuna meglierar la situaziun difficila da las medias da lingua taliana en il Grischun e facilitar ad ellas da rapportar davart il chantun en lingua taliana. Producì vegn il servetsch en la redacziun regiunala da la ats a Cuira.

Sper ils dus collegas da lingua tudestga surpiglia Fabiana Calsolaro la nova incumbensa d'installar il servetsch regiunal per il Grischun dal sid. Il servetsch cumpiglia rapports dals secturs politica, economia, societad e cultura.


Infurmaziuns:
- chantun Grischun: Martin Jäger, cusseglier guvernativ, tel. 081 257 27 01, e-mail: Martin.Jaeger@ekud.gr.ch
- ats: Bernard Maissen, chauredactur, tel. 031 309 33 33, e-mail: bernard.maissen@sda-ats.ch


Gremi: departament d'educaziun, cultura e protecziun da l'ambient
Funtauna: rg departament d'educaziun, cultura e protecziun da l'ambient