Gievgia e venderdi ha salvà la conferenza svizra dals chanceliers chantunals sia dieta annuala da primavaira a Cuira. Ils temas centrals da la conferenza èn stads la concepziun da la planisaziun politica sco er l'ulteriur proceder concernent il e-voting.

A la dieta en la sala Chalavaina a Cuira èn sa participadas e participads 21 chancelieras e chanceliers, il chancelier federal Walter Thurnherr sco er il pledader dal cussegl federal André Simonazzi. La conferenza è stada sut la direcziun da la presidenta Barbara Schüpbach-Guggenbühl (BS). A chaschun da la tschaina ha la presidenta da la regenza Barbara Janom Steiner beneventà cordialmain ils giasts en il Grischun.

Suenter la decisiun dal cussegl federal d'extender la votaziun electronica è il e-voting stà il tema central da la conferenza. Las chancelieras ed ils chanceliers èn s'occupads dals pass concludids dal cussegl federal per introducir il e-voting en l'entir pajais.

La conferenza svizra dals chanceliers chantunals è vegnida fundada l'onn 1900 a Turitg. Duas giadas per onn sa radunan las chancelieras ed ils chanceliers dals chantuns sco er il chancelier federal per questa conferenza. Ina da lur incumbensas centralas è l'ulteriur svilup da las prestaziuns da stab da las autoritads. En il focus stattan qua il sustegn da la direcziun, la planisaziun, las refurmas sin plaun da la regenza e dal parlament e las elecziuns e votaziuns.

Fotografia agiuntada:

La conferenza svizra dals chanceliers chantunals ha salvà sia dieta en la sala Chalavaina a Cuira.


Infurmaziuns:
Chancelier Claudio Riesen, chanzlia chantunala dal Grischun, tel. 081 257 22 23, e-mail Claudio.Riesen@staka.gr.ch


Gremi: chanzlia chantunala
Funtauna: rg chanzlia chantunala