Zum Seiteninhalt

Glisch verda per in project d'hotel e da clinica a San Murezzan

  • Erste Mitteilung
  • Neuen Beitrag einfügen
La regenza ha approvà la planisaziun d'utilisaziun Serletta sid concludida da la vischnanca da San Murezzan ils 18 d'october 2015. Tras quai vegn creada la basa per realisar in nov hotel grond sco er ina nova clinica Gut sin la spunda Serletta sut la via Serlas.

Cunter la planisaziun d'utilisaziun èn entrads da sias uras 6 vasts recurs da proprietaris d'immobiglias vischinas. La regenza ha ussa refusà essenzialmain quests recurs, suenter avair examinà las circa 30 violaziuns dal dretg pretendidas. En quest connex è la regenza conscienta che la vista da fin ussa da las singulas immobiglias vischinas vegn a sa pegiurar pervia dals cubus dals edifizis previs. En concordanza cun la vischnanca da San Murezzan ha la regenza valità l'interess public d'in nov cumplex d'hotel e da clinica pli aut ch'ils interess privats opposts. Ord vista da la regenza pussibilitescha il project in ulteriur svilup d'auta qualitad da San Murezzan. Cun ina cundiziun garantescha la regenza ch'ils cubus dals edifizis permess vegnian utilisads effectivamain per intents d'hotel e da clinica, uschia sco quai ch'igl era adina vegnì accentuà avant la votaziun communala.

La procedura per l'approvaziun è sa prolungada pervia da tractativas da reconciliaziun tranter las partidas. Vitiers è vegnida la cumplexitad dals recurs. Plinavant han las partidas profità da tut las garanzias da procedura ch'ellas han gì sin fundament da la giurisdicziun dal tribunal federal, sco per exempel il dretg da s'exprimer da nov tar mintga inoltraziun.

Fotografia agiuntada:
-
© Comet Photoshopping ScRL / Dieter Enz


Infurmaziuns:
cusseglier guvernativ dr. Jon Domenic Parolini, tel. 081 257 23 01, e-mail Jondomenic.Parolini@dvs.gr.ch


Gremi: regenza
Funtauna: rg chanzlia chantunala dal Grischun
Neuer Artikel