La regenza dal Principadi da Liechtenstein ha visità oz – sin invitaziun da la regenza grischuna – il chantun Grischun.

La presidenta da la regenza grischuna Barbara Janom Steiner ha pudì beneventar oz a mezdi en la chasa grischa a Cuira la regenza dal Principadi da Liechtenstein.
Il schef da la regenza Adrian Hasler è vegnì accumpagnà dal viceschef da la regenza Daniel Risch, dal cusseglier guvernativ Mauro Pedrazzini, da la cussegliera guvernativa Aurelia Frick, da la cussegliera guvernativa Dominique Gantenbein sco er dal secretari general Markus Biedermann. La regenza grischuna è stada preschenta cumplettamain. Suenter il barat dals salids uffizials è in gentar cuminaivel stà sin il program.

Las regenzas dal Grischun e dal Liechtenstein han gia adina tgirà stretgas relaziuns amicablas. La visita serva a tgirar questas relaziuns ed a barattar experientschas sin ils champs da la cultura, da l'economia e da la politica.

Fotografias agiuntadas:

La presidenta da la regenza Barbara Janom Steiner retschaiva en la chasa grischa a Cuira il schef da la regenza dal Principadi da Liechtenstein Adrian Hasler.

Las delegaziuns dal Grischun e da Liechtenstein cun la presidenta da la regenza Barbara Janom Steiner ed il schef da la regenza dal Principadi da Liechtenstein Adrian Hasler (amez) davant la chasa grischa a Cuira.


Gremi: regenza
Funtauna: rg chanzlia chantunala dal Grischun