Navigation

Inhaltsbereich

  • Erste Mitteilung
  • Neuen Beitrag einfügen
La cumissiun per politica da stadi e strategia ha predeliberà la missiva da la regenza tar la revisiun totala da la lescha chantunala dal dretg da burgais ed ha acceptà quella per mauns dal cussegl grond.

La cumissiun dal cussegl grond per politica da stadi e strategia (CPSS) ha predeliberà la missiva da la regenza tar la revisiun totala da la lescha chantunala dal dretg da burgais. Quai sut la direcziun dal president da la cumissiun Tarzisius Caviezel (Tavau Clavadel) ed en preschientscha dal cusseglier guvernativ Christian Rathgeb sco schef dal departament da giustia, segirezza e sanadad. La revisiun totala da la lescha dal dretg da burgais è necessaria tranter auter per accordar il dretg chantunal a la lescha federala davart il dretg da burgais svizzer, ch'è medemamain vegnida revedida totalmain e ch'entra en vigur il 1. da schaner 2018. Tras la revisiun duain plinavant vegnir serradas largias ch'èn sa mussadas en la pratica en il dretg vertent, ed i duai er vegnir introducida ina sistematica pli simpla.

Per la CPSS èsi stà incontestà ch'i saja avant maun in basegn da reveder totalmain la lescha chantunala dal dretg da burgais. Consequentamain è ella entrada unanimamain sin il project. En la tractativa detagliada ha la gronda maioritad da la cumissiun medemamain acceptà las propostas da la regenza. Duas propostas da minoritad concernan ils termins per la necessitad da domicil e la restituziun da daners retratgs da l'agid social. Correspundentamain propona la cumissiun al cussegl grond d'approvar il project.

Il cussegl grond vegn a tractar la missiva en la sessiun da zercladur 2017.


Infurmaziuns:
Tarzisius Caviezel (Tavau Clavadel), president da la cumissiun per politica da stadi e strategia, tel. 079 610 23 70


Gremi: cumissiun per politica da stadi e strategia
Funtauna: rg chanzlia chantunala dal Grischun
Neuer Artikel