Navigation

Inhaltsbereich

  • Erste Mitteilung
  • Neuen Beitrag einfügen
Cumpareglià cun l'onn precedent èn sa decidids in pau damain scolaras e scolars da far l'examen d'admissiun per ina scola media grischuna. Da las 764 candidatas e candidats han 508 reussì l'examen.

Il favrer ed il mars han gì lieu en las nov scolas medias en il chantun Grischun ils examens d'admissiun centrals per entrar en ina scola media grischuna. Tut en tut han absolvì quest onn 360 uffants (2016: 366) da la 6. classa da la scola primara sco er 404 giuvenils (onn 2016: 429) da la segunda u terza classa da la scola secundara sco er en singuls cas dal 10. onn da scola ils examens d'admissiun.
Dals 360 (2016: 366) uffants da la scola primara han 227 (2016: 223) reussì l'admissiun per la 1. classa gimnasiala. Quai è ina quota da success da circa 63 pertschient (2016: 61 pertschient). La quota da success inditgescha la part da scolaras e scolars examinads che ha reussì l'examen d'admissiun. Per las scolaras primaras ed ils scolars primars che han absolvì cun success l'examen d'admissiun è la procedura d'admissiun dentant terminada definitivamain pir cun la promoziun da la 1. en la 2. classa gimnasiala.
Analogamain a l'onn precedent importa la quota d'admissiun circa 13 pertschient. La quota d'admissiun sa referescha al dumber total da scolaras e scolars da la medema classa en il chantun. La grondezza da referenza da quest onn d'examen furman ils 1740 uffants (2016: 1730) da las 6. classas da la scola primara ch'èn naschids l'onn 2004.
Dals 404 giuvenils (2016: 429) che han fatg l'examen d'admissiun chantunal per la 3. classa dal gimnasi sco er per la 1. classa da la scola media commerziala u da la scola media spezialisada (examen unifitgà) directamain or da la scola secundara u suenter avair absolvì quella, han 282 (2016: 306) reussì l'admissiun per ina scola media grischuna. 183 candidatas e candidats (2016: 191) han ademplì las premissas per entrar en la 3. classa dal gimnasi; 99 candidatas e candidats (2015: 115) han cuntanschì l'admissiun per entrar en la 1. classa da la scola media commerziala u da la scola media spezialisada. Tar las gimnasiastas ed ils gimnasiasts futurs correspunda quai ad ina quota da success da circa 45 pertschient (2016: 44 pertschient) ed ad ina quota d'admissiun da bundant 10 pertschient (2016: stgars 11 pertschient).


Infurmaziuns:

Regina Just Brodbeck, uffizi per la furmaziun media-superiura, manadra da la partiziun "scolas medias", tel. 081 257 61 69, e-mail: Regina.Just@ahb.gr.ch


Gremi: uffizi per la furmaziun media-superiura
Funtauna: rg uffizi per la furmaziun media-superiura
Neuer Artikel