Zum Seiteninhalt

Avertura da la nova punt artgada "Val Mulinaun"

  • Erste Mitteilung
  • Neuen Beitrag einfügen
Il traject stretg da la via sursilvana tranter Rabius e Sumvitg, che ha bleras stortas ed ina lunghezza dad 1,33 kilometers, vegn renovà. Per traversar la Val Mulinaun po vegnir averta oz la part principala da questa renovaziun, numnadamain la punt "Val Mulinaun".

La projectaziun e la construcziun da la punt "Val Mulinaun" èn stadas incumbensas pretensiusas tant areguard la tecnica sco er areguard la concepziun. Cunzunt il terren stip cuntegneva ses privels, e la traversada sur l'aual vi stueva ademplir grondas pretensiuns envers l'apparientscha ed envers la construcziun da la punt. Sin basa da quai è vegnida publitgada l'onn 2013 ina concurrenza da projects per la punt "Val Mulinaun". Gudagnà la concurrenza ha la punt artgada dal project ARTG da Schnetzer Puskas Ingenieure SA.

Questa nova punt artgada d'ina lunghezza da circa 210 meters cun in purtader dals vials ch'è prestendì relativamain pauc, è ina construcziun classica da betun armà. L'artg da la punt ha ina largezza da circa 98 meters ed il punct il pli aut da la punt sa chatta circa 50 meters sur l'aual da la Val Mulinaun. Ensemen cun ils corduns ha la platta da la punt dapertut ina ladezza da 10,35 meters. Tut en tut custa la punt circa 7,5 milliuns francs.

Suenter che la punt artgada è vegnida surdada oz al traffic, sto anc vegnir betunà ed isolà il sectur da la platta dals vials da la vart da la muntogna. Tar il cuntrafort da la vart da Rabius tanscha quel en la via sursilvana oriunda. Plinavant sto vegnir messa ina nova cuvrida. Ultra da quai survegn quest sectur ina saiv directiva. En ils conturns directs da la punt vegnan renatiralisadas las pistas da construcziun sco er parts da l'anteriura via sursilvana. Fin l'atun 2017, cur che questas lavurs da finiziun e da renatiralisaziun èn terminadas, vegn il traffic sur la punt "Val Mulinaun" da princip gia manà sin dus vials, ch'èn dentant pli stretgs.

Fotografias agiuntadas:
-
Construcziun da la nova punt artgada "Val Mulinaun"

-
La punt "Val Mulinaun" curt avant la finiziun


Infurmaziuns:

- Roger Stäubli, schef da la construcziun da vias, uffizi da construcziun bassa dal Grischun, tel. 081 257 38 42, e-mail: Roger.Staeubli@tba.gr.ch  


Gremi: uffizi da construcziun bassa dal Grischun
Funtauna: rg uffizi da construcziun bassa dal Grischun
Neuer Artikel