Zum Seiteninhalt

Lev augment da la quota d'agid social en il chantun Grischun

  • Erste Mitteilung
  • Neuen Beitrag einfügen
En il chantun Grischun èn vegnidas sustegnidas 2511 persunas en 1574 cas cun agid social l'onn 2015. La quota d'agid social è s'augmentada levamain envers l'onn precedent dad 1,2 pertschient sin 1,3 pertschient. Ella sa chatta però anc adina cleramain sut la quota naziunala (2014: 3,2%). Anc adina è il Grischun tranter ils chantuns cun las quotas d'agid social las pli bassas da tut la Svizra. Quai mussan ils resultats da la statistica svizra d'agid social da l'uffizi federal da statistica (UST).

Quota d'agid social levamain augmentada

L'onn 2015 dovran en il chantun Grischun 1,3 pertschient da la populaziun agid social. Questa quota è per 0,1 puncts procentuals pli auta che quella da l'onn precedent. Per cas retiran en media 1,6 persunas agid social. La quota d'agid social variescha tranter ils singuls districts. Sco durant ils onns precedents demussa il district da Malögia la quota la pli bassa (0, 3%), entant ch'il district da la Plessur ha la quota la pli auta (2,7%). Questa quota maximala dal chantun Grischun è dentant anc adina cleramain sut la media svizra da 3,2 pertschient (2014).

-
Grafica: Quota d'agid social tenor districts, chantun Grischun, 2015
Funtauna UST - Statistica d'agid social 2015

Dapli persunas pli veglias en l'agid social

La part da las retschavidras e dals retschaviders d'agid social da 46 fin 55 onns è s'augmentada en cumparegliaziun cun l'onn precedent per 0,5 puncts procentuals ed importa 16,4 pertschient. Las persunas da 56 fin 64 onns furman ina part da 10,9 pertschient. Quai correspunda ad in augment da 0,9 puncts procentuals. La gruppa da vegliadetgna anc adina la pli gronda en l'agid social èn – cun ina quota da 29,2 pertschient – las persunas da 0 fin 17 onns. La gruppa da vegliadetgna la segund gronda è quella da las persunas da 26 fin 35 onns, cun ina quota da 17,9 pertschient.

Dapli cas d'ina persuna e dapli persunas ch'educheschan sulettas
Ils cas d'ina persuna furman cun ina part da 65,5 pertschient anc adina la gruppa la pli gronda da retschavidras e retschaviders d'agid social en il chantun Grischun. Sco cas d'ina persuna vegnan resumads cas da persunas che vivan sulettas, ma er cas da persunas che na vivan betg sulettas. Questas ultimas èn persunas che furman in agen cas d'agid social, che vivan dentant ensemen cun ina u cun pliras persunas, per exempel en ina cuminanza d'abitar u persunas giuvnas creschidas che vivan anc tar lur geniturs. Cumpareglià cun l'onn precedent è la quota da quests cas d'ina persuna s'augmentada per 0,3 puncts procentuals. La quota da las persunas ch'educheschan sulettas è medemamain s'augmentada per 0,3 puncts procentuals ed importa 21,2 pertschient. Las ulteriuras parts da las retschavidras e dals retschaviders d'agid social èn pèrs cun uffants (8,6%) e pèrs senza uffants (4,5%).

-
Grafica: Cas d'agid social tenor structura dals cas, chantun Grischun, 2005-2015
Funtauna UST - Statistica d'agid social 2015

Leva diminuziun da la quota da las retschavidras e dals retschaviders da pajaments anticipads d'aliments
L'onn 2015 èn vegnids pajads anticipadamain aliments en 359 cas per 775 persunas. La quota da las retschavidras e dals retschaviders da pajaments anticipads d'aliments (part da retschaviders en cumparegliaziun cun l'entira populaziun) è sa sbassada levamain da 0,43 pertschient (2014) a 0,40 pertschient (2015). Uschia è la quota uschè bassa sco anc mai. La quota da las retschavidras e dals retschaviders da pajaments anticipads d'aliments sa chatta en il chantun Grischun medemamain cleramain sut la quota svizra da 0,66 pertschient (2014).


Infurmaziuns:
- cussegl guvernativ dr. Jon Domenic Parolini, schef dal departament d'economia publica e fatgs socials, cuntanschibel da las 10.00 – 11.00, tel. 081 257 23 01, e-mail JonDomenic.Parolini@dvs.gr.ch  
- Susanna Gadient, manadra da l'uffizi dal servetsch social dal Grischun, tel. 081 257 26 51, e-mail Susanna.Gadient@soa.gr.ch  
- Marc Dubach, uffizi federal da statistica, schef da la secziun agid social, tel. 058 463 65 78, e-mail marc.dubach@bfs.admin.ch


Gremi: uffizi federal da statistica, uffizi dal servetsch social chantunal dal Grischun
Funtauna: rg uffizida statistica, uffizi dal ser federal vetsch social chantunal dal Grischun
Neuer Artikel