La regenza ha prendì posiziun tar in project da consultaziun da la confederaziun. Ultra da quai ha ella concedì ina contribuziun chantunala per la renovaziun totala dal stadion da glatsch da Tavau.
Il concept per il transport da rauba cun la viafier ha intginas largias
La regenza beneventa da princip il concept da la confederaziun per il transport da rauba cun la viafier. Ella ha prendì posiziun tar in project da consultaziun correspundent da l'uffizi federal da traffic (UFT). Quest concept fixescha la posiziun da la confederaziun areguard la direcziun a lunga vista da la planisaziun dals stabiliments dal transport da rauba cun la viafier. Ultra da quai dat il concept scleriment davart la dumonda, co ch'ils chantuns duain ademplir ils interess federals tar la planisaziun.
La regenza grischuna è persvadida ch'il concept per il transport da rauba cun la viafier possia contribuir en moda positiva a cuntanscher las finamiras da la planisaziun dal territori e da la politica da traffic. Ella renda però er attenta al fatg ch'il concept ha intginas largias impurtantas. Il concept qua avant maun cumpiglia per exempel praticamain mo la garanzia e l'amplificaziun da stabiliments existents. Mancar manca pia ina planisaziun prospectiva per lieus potenzials futurs.
Dal concept cun il basegn per l'onn 2030 resulta bain ch'i vegnan ad esser necessarias capacitads supplementaras en il territori da Landquart e da Son Gagl. Senza savair exactamain tge che quai signifitga propi, po la segirezza da planisaziun da novs lieus e da las surfatschas che vegnan duvradas per quels però vegnir garantida mo insuffizientamain. Ultra da quai constatescha la regenza ch'i manca ina politica logistica da la confederaziun che resguarda tut ils meds da traffic, e ch'i duessan vegnir integrads aspects transcunfinals.
Documents da consultaziun UFT
Contribuziun chantunala per la renovaziun totala dal stadion da glatsch da Tavau
La regenza ha concedì a la vischnanca da Tavau ina contribuziun chantunala da 5 milliuns francs per la renovaziun totala dal stadion da glatsch da Tavau. Il project general cumpiglia la renovaziun da la tribuna sid, la renovaziun da las gardarobas existentas sco er la construcziun da gardarobas supplementaras e da locals sanitars supplementars sut la tribuna sid, la midada da construcziun da las tribunas ost e vest, l'augment dal dumber da plazzas da seser (per part sin donn e cust da las plazzas da star en pe), la construcziun d'ina ulteriura empora, novas surfatschas nunmobigliadas, la realisaziun d'in nov concept d'urgenza, ulteriuras surfatschas da catering, in ulteriur restaurant, ina colliaziun cun la halla da trenament planisada dal club da hockey da Tavau sco er in corridor che collia tut ils secturs.
Dapi passa 35 onns è il stadion da glatsch da Tavau il lieu d'acziun per ils gieus da campiunadi dal club da hockey da Tavau sco er per la Cuppa Spengler ed uschia ina infrastructura centrala per il sistem general turistic a Tavau.
©Marques AG
Las lavurs preliminaras per graubündenVIVA 2018‑2020 èn surdadas
Sin dumonda da l'uniun graubündenVIVA incumbensescha la regenza la firma Quant SA, Flem, cun las lavurs preliminaras per la realisaziun da graubündenVIVA 2018‑2020. graubündenVIVA è in'uniun che vul far dal Grischun il center da la cultura da giudiment alpina. In program da plirs onns cun il titel da lavur "graubündenVIVA – daletg da las muntognas" duai rinforzar il Grischun sco plazza economica (agricula) sur ils temas alimentaziun e culinarica. Sco punct culminant dal project duai avair lieu dal matg 2019 fin l'october 2020 ina festa dals senns en tschintg spazis da divertiment en il chantun Grischun ed en lieus tschernids en Svizra.
Per las lavurs preliminaras da realisaziun ha la regenza approvà in volumen d'incumbensas en la dimensiun da 360 700 francs en il rom da la nova politica regiunala (NPR). Las contribuziuns NPR vegnan surpigliadas mintgamai per la mesadad da la confederaziun e dal chantun.
La construcziun da novs indrizs d'ennavar a Mustér è ussa pussaivla
La regenza ha approvà la revisiun parziala da la planisaziun locala, ch'è vegnida concludida da la vischnanca da Mustér ils 29 da november 2015. Quai è la basa giuridica per construir novs indrizs d'ennavar en il territori da skis da la vischnanca. En il plan da zonas èn fixadas surfatschas ennavadas da 26,6 hectaras, quai che correspunda ad ina lunghezza da la pista da circa 11 kilometers. L'orizont da realisaziun per quests indrizs d'ennavar cumpiglia 10 onns ed è repartì sin quatter etappas.
Glisch verda per ina nova basa per il mantegniment da las vias a Zernez
La regenza ha approvà il project per construir ina nova basa per il mantegniment da las vias da l'uffizi da construcziun bassa a Zernez cun cundiziuns e cun permissiuns spezialas. Las basas existentas per il mantegniment da las vias Ova Spin e Susch vegnan remplazzadas tras ina nova basa, perquai ch'ellas na correspundan betg pli a las pretensiuns odiernas areguard la grondezza, la realisaziun architectonica e l'equipament tecnic. Ultra da quai sa chatta la basa Ova Spin a l'entrada dal Parc naziunal svizzer en ina cuntrada sensibla e n'è perquai betg adattada per vegnir engrondida correspundentamain.
Cun la nova basa per il mantegniment da las vias a Zernez po vegnir garantì il mantegniment manaschial ed architectonic da la rait da vias principalas d'ina lunghezza totala da ca. 55 km e da las vias da colliaziun d'ina lunghezza da ca. 5 km. Zernez sco lieu da staziunament è central e porscha blers avantatgs areguard ils viadis a la lavur, la direcziun da las gruppas da lavur, il parcadi ed il mantegniment dals vehichels sco er la furniziun da sal.
Gremi: regenza
Funtauna: rg chanzlia chantunala dal Grischun