Navigation

Inhaltsbereich

  • Erste Mitteilung
  • Neuen Beitrag einfügen
La regenza ha approvà la construcziun d'ina nova ovra idraulica a Tavau. Ultra da quai ha ella approvà il project victur per la correcziun pretensiusa da la via tranter Tinizong e Rona.

La nova ovra idraulica a l'aual dal Flüela po vegnir construida
La regenza ha approvà il project per la construcziun d'ina nova ovra idraulica a l'aual dal Flüela da l'ovra electrica Tavau SA (OET SA) cun cundiziuns e cun pretensiuns. La vischnanca da Tavau ha dà a la OET gia ils 24 da november 2013 la concessiun correspundenta dal dretg da las auas. Ils elements ils pli essenzials dal project èn la construcziun d'ina tschiffada "Dörfji", d'in conduct da pressiun per lung da l'aual dal Flüela sco er ina centrala da l'ovra electrica tranter Färich ed Oberhöfji. La media da la producziun annuala da l'ovra electrica duai importar 7,98 milliuns uras da kilowatt, quai che correspunda a l'electricitad che 800 chasas d'ina famiglia dovran en in onn. La OET fa quint cun custs da var 16,6 milliuns francs.

- -
Tschiffada "Dörfji / Centrala da l'ovra electrica tranter Färich ed Oberhöfji

Tschernì il project victur per la correcziun dal chant da Rona

La regenza ha approvà il project victur da la concurrenza per prestaziuns globalas per la correcziun dal traject "chant da Rona" da la via dal Güglia tranter Tinizong e Rona. Sco victur è sa fatg valair il project "Scolopendra" da la cuminanza da lavur "CULAV chant da Rona", en la quala la firma J. Erni SA da Flem ha la direcziun.
En in'emprima fasa da selecziun anonima èn otg teams da project sa preschentads a la sentenzia da la giuria che sa cumpona da spezialists da tut la Svizra. La stad 2016 ha quella tschernì quatter projects.
Il project victur "Scolopendra" cun custs previsibels da circa 14,5 milliuns francs, sa distingua cun ina soluziun robusta, persistenta ed economica. Ultra da quai prevesa il team da project da pudair terminar l'adattaziun dal traject d'ina lunghezza da var 900 meters da la via dal Güglia, ch'è geologicamain difficil, in onn pli baud che planisà oriundamain. Cun l'adattaziun dal "chant da Rona" èsi vegnì cumenzà gia quest onn. Questas lavurs vegnan cuntinuadas la primavaira 2018 cun quest traject da project. Previsiblamain l'onn 2021 duai alura vegnir terminada l'adattaziun cumpletta da quest traject da la via cun metter la cuvrida definitiva.

-

Contribuziun chantunala per producir functional food
Cun resalva d'ina finanziaziun totala segirada ha la regenza garantì a la Functional Food Grono ScRL ina contribuziun chantunala da 500 000 francs per metter en pe a Grono in lieu da producziun. Ultra da quai ha ella concedì in emprest chantunal dad 1,5 milliuns francs cun ina durada da 10 onns.
La Functional Food Grono ScRL vegn installada a Grono sco lieu da producziun central da la Stratos SA. La Stratos SA cun domicil a Vaduz è vegnida fundada l'onn 2010 e dat lavur a circa 400 persunas en tut l'Europa. Dapi l'onn 2013 sviluppa ella ils uschenumnads products da functional food (vivondas funcziunalas). En quest connex sa tracti da products che vegnan enritgids cun aditivs alimentars. La producziun è vegnida lantschada il matg 2017. Ultra da la producziun vegnan messas en pe a Grono er funcziuns sco administraziun, finanzas, cumpra, distribuziun, perscrutaziun, svilup ed ina partiziun da logistica. Fin l'onn 2022 investescha la Functional Food Grono ScRL circa 18,3 milliuns francs en quest lieu e vul stgaffir tut en tut 70 novas plazzas da lavur.

-
Il lieu da producziun da la Functional Food Grono ScRL

Approvà ils projects d'avertura dal guaud a Zernez ed en la Bregaglia
Per garantir duraivlamain las funcziuns dal guaud dovri ina tgira ed ina cultivaziun correspundenta da tal. Actualmain n'han quests guauds dentant savens betg in access suffizient. Per Zernez e per la Bregaglia ha la regenza approvà dus projects d'avertura dal guaud per meglierar là la situaziun.
La rait da vias da guaud ch'exista a Zernez sco er la via tranter Susch e Zernez che serva sco axa per manar davent laina na correspundan betg pli a las pretensiuns dad oz areguard la ladezza, la capacitad da chargia e la segirezza. Il project qua avant maun cuntegna il schlargiament da la via existenta da ca. 2,8 kilometers lunghezza tranter Güstizia e Gondas ad ina ladezza da 3,3 meters. Planisà è ultra da quai da construir in nov attatg Gondas a la via chantunala sco er in nov access agricul en direcziun da Charal. Per quest project garantescha la regenza a la vischnanca da Zernez ina contribuziun da circa 1,76 milliuns francs.
Cun in ulteriur project renda la vischnanca da Bregaglia accessibel il territori "Ruinäda" che po vegnir cultivà actualmain mo per helicopter. Cun ina via da guaud nova d'ina lunghezza da var 120 meters vegni pussibilità da cultivar il guaud en il futur cun agid d'ina crana a cabel. A quest project vegn garantida ina contribuziun da circa 69 000 francs.

- -
Ils projects d'avertura dal guaud a Zernez (a sanestra) ed en la Bregaglia


Gremi: regenza
Funtauna: rg chanzlia chantunala dal Grischun
Neuer Artikel