Zum Seiteninhalt

La cumissiun dal cussegl grond ha tractà la revisiun totala da la lescha per promover la tgira da persunas malsaunas

  • Erste Mitteilung
  • Neuen Beitrag einfügen
La cumissiun dal cussegl grond per sanadad e fatgs socials ha predeliberà la missiva da la regenza tar la revisiun totala da la lescha per promover la tgira da persunas malsaunas e propona al cussegl grond d'approvar il project.

La cumissiun per sanadad e fatgs socials (CSF) dal cussegl grond ha predeliberà la missiva da la regenza tar la revisiun totala da la lescha per promover la tgira da persunas malsaunas. La sesida è vegnida presidiada da la presidenta da la cumissiun Erika Cahenzli-Philipp. A questa sesida èn stads preschents er il cusseglier guvernativ Christian Rathgeb e represchentants da l'administraziun.

Il project che prevesa da realisar il rapport tractà dal cussegl grond en la sessiun da zercladur 2016 davart la finanziaziun dals ospitals e da la tgira è vegnì tramess en consultaziun sco revisiun parziala. Suenter in resun positiv ha la regenza decidì da profitar da l'occasiun e da colliar la revisiun parziala materiala cun ina revisiun totala formala. Uschia po vegnir tegnì quint dal postulat Nick da l'onn 2003.

La lescha per promover la tgira da persunas malsaunas vertenta deriva da l'onn 1979 ed è vegnida revedida parzialmain bleras giadas fin oz. Da quai ha logicamain patì la sistematica da la lescha e la legibladad. La cumissiun ha perquai renconuschì la necessitad d'ina revisiun totala formala ed ha acceptà unanimamain il project.

Cun tractar las singulas disposiziuns è la cumissiun sa fatschentada intensivamain da l'entir relasch, ma ella è sa restrenschida da far propostas da midadas materialas mo là, nua che la procedura da consultaziun è er vegnida fatga. In eventual ulteriur basegn d'agir en il senn material duai vegnir tractà pli tard en missivas separadas per las revisiuns parzialas vegnintas. Per la cumissiun èsi actualmain gist ed impurtant ch'ils puncts dal rapport davart la finanziaziun dals ospitals e da la tgira concludids dal cussegl grond possian vegnir realisads e che la lescha possia vegnir suttamessa il medem mument ad ina revisiun totala formala.

Per gronda part sustegna la cumissiun il sboz da la lescha ed ha fatg mo duas propostas da midada. Mo la proposta da midar la lescha davart ils servetschs psichiatrics dal Grischun sur la revisiun totala menziunada ha procurà per ina divergenza d'opiniuns en la cumissiun. Ina gronda maioritad ha pretendì qua da restar tar il dretg vertent.

La cumissiun per sanadad e fatgs socials propona al cussegl grond d'acceptar la revisiun totala da la lescha per promover la tgira da persunas malsaunas.

Il cussegl grond vegn a tractar questa fatschenta en la sessiun d'avust 2017.


Infurmaziuns:
Presidenta da la cumissiun Erika Cahenzli-Philipp, Tel. 079 775 69 39


Gremi: cumissiun per sanadad e fatgs socials
Funtauna: rg cumissiun per sanadad e fatgs socials
Neuer Artikel