Zum Seiteninhalt

In millipes per il chant da Rona – exposiziun dals projects

  • Erste Mitteilung
  • Neuen Beitrag einfügen
Durant 2 emnas vegnan ils projects da la segunda fasa da la concurrenza per prestaziuns globalas pertutgant il chant da Rona exponids publicamain en la sala communala a Cunter. Cun il project victur SCOLOPENDRA da la "CULAV chant da Rona" po vegnir realisada ina soluziun architectonica optimala per engrondir il traject da via en il sectur dal chant da Rona al pass dal Güglia.

Da Tinizong fin entaifer il vitg da Rona èn mo vegnidas fatgas las lavurs da mantegniment las pli necessarias en il sectur dal chant da Rona dapi l'adattaziun da la via dal Güglia ils onns 1935 fin 1940. Sin quest traject cun bleras stortas, stretg e malsurvesaivel duai il chant da Rona vegnir adattà a partir da l'onn 2018 a las pretensiuns odiernas en quai che concerna la segirezza cunter privels da la natira e la charrabladad per il traffic pesant e da bus.

Per chattar ina soluziun che persvada tant dal puntg da vista tecnic sco er concepziunal per questas lavurs pretensiusas ha il project stuì vegnir accordà aposta a las cumpetenzas ed a l'equipament da las interpresas executivas.
Perquai è l'uffizi da construcziun bassa dal Grischun sa decidì da publitgar las lavurs per il traject da via d'ina lunghezza da circa 900 meters en ina concurrenza per ina prestaziun globala da dus stgalims (lavurs d'inschigneria e lavurs da realisaziun da la construcziun). En in'emprima fasa da selecziun anonima èn sa preschentads en quest connex otg teams da project a la giuria. La giuria ha tschernì la stad 2016 quatter projects che han pudì inoltrar en ina segunda fasa da la concurrenza lur project per l'adattaziun da la via dal Güglia. Alura ha la giuria examinà detagliadamain ils quatter projects ed ha valità il project SCOLOPENDRA da la "CULAV chant da Rona" sco il meglier. Sin basa da quest giudicament ha la giuria recumandà a la regenza grischuna da dar al project SCOLOPENDRA l'agiudicaziun per la realisaziun. Cun il conclus dals 4 da fanadur 2017 ha la regenza correspundì a questa proposta ed ha approvà quest project.

Il project victur cun custs da circa 14,5 milliuns francs sa distingua cun ina soluziun robusta, persistenta ed economica. La construcziun regulara serpegia en moda eleganta per la costa stippa si ed ha perquai survegnì il num SCOLOPENDRA – latin per il millipes.

Ils projects da la concurrenza vegnan exponids publicamain dals 24 d'avust 2017 fin ils 7 da settember 2017, da glindesdi fin sonda (da las 8.00 a las 17.00), en la sala communala a Cunter.

Ulteriuras infurmaziuns davart la correcziun dal chant da Rona chattais Vus en il fegl d'infurmaziun actual da l'uffizi da construcziun bassa dal Grischun.

Fotografia agiuntada:
-
Dissegn a maun dal project SCOLOPENDRA


Infurmaziuns:
- Reto Knuchel, inschigner chantunal, uffizi da construcziun bassa dal Grischun, tel. 081 257 37 01, e-mail Reto.Knuchel@tba.gr.ch


Gremi: uffizi da construcziun bassa dal Grischun
Funtauna: rg uffizi da construcziun bassa dal Grischun
Neuer Artikel