Zum Seiteninhalt

La regiun Lumbardia ed il chantun Grischun discutan davart il traffic transcunfinal

  • Erste Mitteilung
  • Neuen Beitrag einfügen
Represchentantas e represchentants da la regiun taliana Lumbardia e dal chantun Grischun èn sa scuntrads ier a Cuira per discurrer davart differents temas transcunfinals. En il center dals discurs èn stadas diversas dumondas avertas davart il traffic.

La scuntrada è vegnida organisada sin giavisch da la regiun Lumbardia. Il sutsecretari da stadi Ugo Parolo sco represchentant da la regiun Lumbardia è vegnì a Cuira per discurrer cun Mario Cavigelli, il schef dal departament da construcziun, traffic e selvicultura dal Grischun, davart differents temas transcunfinals. A chaschun da questa scuntrada èn vegnidas tractadas dumondas per tegnair avert la Forcola di Livigno ed il pass dal Spleia sco er areguard il tunnel Munt la Schera, il pass da l'Umbrail e la finala er areguard in studi davart in tunnel da viafier al Stelvio.

Questa occurrenza ha permess in barat avert davart ils temas menziunads. Per motivs chapaivels èn las posiziuns sco er ils interess da las partidas en singuls puncts fitg differents. Quai pertutga en spezial la dumonda da tegnair avert las duas vias da colliaziun Forcola di Livigno e pass dal Spleia. Qua datti cleras regulaziuns che na pon betg vegnir messas a disposiziun ord vista dal chantun.

Er il tema concernent l'utilisaziun dal tunnel Munt la Schera per il traffic privat e turistic da e per Livigno è vegnì discutà. Qua dovri dentant l'integraziun ed il consentiment da las Ovras electricas d'Engiadina SA sco proprietaria dal stabiliment per eventualas novas soluziuns. Tar ils ulteriurs temas èn ins stà d'accord che la plivalur dals projects respectivs stoppia vegnir eruida considerond en moda cumplessiva ils interess dal Grischun e da la Lumbardia.


Infurmaziuns:
cusseglier guvernativ Mario Cavigelli, schef dal departament da construcziun, traffic e selvicultura, tel. 081 257 36 01, e-mail Mario.Cavigelli@bvfd.gr.ch


Gremi: departament da construcziun, traffic e selvicultura
Funtauna: rg departament da construcziun, traffic e selvicultura
Neuer Artikel