La scolaziun da selviculturs al center da furmaziun per il guaud ibW a Maiavilla è ina istorgia da success. Quella dura ussa dapi 50 onns. Quai vegn celebrà oz commensuradamain cun in act festiv en preschientscha da la presidenta da la confederaziun Doris Leuthard.

L'onn 1967 ha cumenzà l'emprima classa da selviculturs cun in purtader interchantunal cun sia instrucziun. Ils 13 chantuns Uri, Sviz, Sursilvania, Sutsilvania, Glaruna, Zug, Schaffusa, Appenzell dadens, Appenzell dador, Son Gagl, Grischun, Turgovia e Tessin sco er il principadi da Liechtenstein han furmà communablamain la "fundaziun Scola interchantunala da selviculturs Maiavilla SISM". Ils proxims tschintg decennis è la scola da selviculturs sa sviluppada fermamain ed ha scolà fin oz 845 selviculturas e selviculturs.

Maiavilla sco lieu da staziunament
Dapi l'onn 1975 ha lieu l'instrucziun en ina chasa da scola construida aposta per la scolaziun da selviculturs. Questa chasa da scola cumpiglia er ina mensa ed in internat. Part da la scola fan er in parc da vehichels e da maschinas sco er in agen guaud da muntogna che serva a l'instrucziun. L'edifizi è vegnì engrondì l'onn 1993 e cumplettà l'onn 2007 cun in center da laina e da tecnologia.

Fotografia ord l'aria dal center da furmaziun per il guaud ibW a Maiavilla

Instrucziun pratica e multifara
Dapi il cumenzament vegnan las studentas ed ils students scolads en moda pratica a la scola da selviculturs. En il decurs dal temp è la paletta da scolaziuns vegnida cumplettada cun ulteriurs curs da scolaziun, sper la scolaziun da selviculturs. L'onn 1997 è vegnì endrizzà a Maiavilla il post spezialisà naziunal per la tgira dal guaud da muntogna e l'onn 2014 il post spezialisà per tecnica da construcziun forestala.
L'instrucziun s'orientescha a las pretensiuns envers il guaud che sa midan. Pli baud eran centralas las funcziuns utilisaziun da laina e protecziun cunter privels da la natira. Oz daventan pli e pli impurtantas ponderaziuns che han in connex cun l'ecologisaziun da la cultivaziun dal guaud, cun la protecziun da la natira e da la cuntrada sco er cun la perdita da la rentabilitad dals manaschis forestals. Ultra da quai survegn il tema midada dal clima adina dapli impurtanza.
L'onn 2008 ha l'emprima dunna terminà ses curs da scolaziun sco selvicultura diplomada. L'onn 2009 è la scola da selviculturs vegnida integrada en la scola spezialisada superiura da la Svizra sidorientala ibW. Uschia èn resultads avantatgs per tuttas duas varts areguard il barat da docents ed areguard il diever da locals.

Act festiv per il giubileum da 50 onns
L'onn da giubileum 2017 vegn festivà commensuradamain. A l'act festiv dad oz vegnan spetgads passa 100 giasts da l'entira Svizra. Er la presidenta da la confederaziun Doris Leuthard è da la partida a la festa da giubileum. Il cusseglier guvernativ Mario Cavigelli, president da la scola interchantunala da selviculturs, beneventa ils giasts a Maiavilla. Per il giubileum è vegnida elavurada ina publicaziun festiva davart l'istorgia da la scola da selviculturs che illustrescha en moda survesaivla ils ultims 50 onns da questa scola.

Agiunta:
publicaziun festiva "50 onns scola interchantunala da selviculturs"


Infurmaziuns:
cusseglier guvernativ Mario Cavigelli, schef dal departament da construcziun, traffic e selvicultura, president da la scola interchantunala da selviculturs Maiavilla, tel. 081 257 36 01, e-mail Mario.Cavigelli@bvfd.gr.ch


Gremi: departament da construcziun, traffic e selvicultura / scola spezialisada superiura da la Svizra sidorientala ibW
Funtauna: rg departament da construcziun, traffic e selvicultura / scola spezialisada superiura da la Svizra sidorientala ibW