Zum Seiteninhalt

La regenza refusa la reducziun dal tschains d'aua

  • Erste Mitteilung
  • Neuen Beitrag einfügen
Ensemen cun ils auters chantuns da muntogna ed en concordanza cun las vischnancas grischunas sa dosta la regenza cunter ina reducziun generala dal tschains d'aua. Per ella n'è la proposta dal cussegl federal motivabla ni objectivamain ni politicamain.

Il sboz d'ina revisiun parziala da la lescha davart il dretg da las auas ch'il cussegl federal ha tramess en consultaziun cuntegna sco punct central la nova regulaziun dal maximum dal tschains d'aua per il temp suenter l'onn 2019. La regenza grischuna ha prendì posiziun latiers e sustegna en quest connex cumplainamain la posiziun ch'è vegnida elavurada sut il tetg da la conferenza da las regenzas dals chantuns alpins (CRCA). Ella beneventa la divisiun proponida en ina regulaziun transitorica ed en ina regulaziun a lunga vista. Quai sin basa da la ponderaziun ch'il nov sistem da tschains d'aua na possia betg vegnir discutà, fin ch'i n'è betg cler co ch'il martgà d'electricitad futur vegn a vesair ora.

La reducziun generala dal tschains d'aua d'actualmain 110 francs ad 80 francs per kilowatt brut ch'il cussegl federal prevesa per il temp transitoric (2020‑2022) n'è però betg acceptabla per la regenza e vegn refusada strictamain. Ina reducziun generala na sa lascha motivar ni objectivamain ni politicamain e signifitgass effectivamain ina subvenziun ineguala nungiustifitgada a favur da las interpresas d'electricitad che vegnan controlladas per gronda part dals chantuns da la Svizra bassa. Ina reducziun dal tschains d'aua per singulas interpresas che basegnan sustegn vegn percunter resguardada da princip sco degna da vegnir examinada. Il cussegl federal propona quai en il senn d'ina varianta alternativa che n'è però anc betg elavurada concretamain en il project da consultaziun. Questa varianta po però vegnir realisada mo, sche las interpresas èn prontas da preschentar la situaziun economica da lur portafegls davart la forza idraulica en moda cumplainamain transparenta concernent ils custs e las entradas e sch'igl è reglà cleramain sin il stgalim da la lescha sut tge premissas ch'ina interpresa vala sco interpresa che basegna sustegn.

Questas finamiras dals chantuns da muntogna – soluziun transitorica fin a l'entrada en vigur d'in nov urden dal martgà d'electricitad, nagina adattaziun pauschala dal maximum dal tschains d'aua per il temp transitoric ed examinaziun da la varianta alternativa – vegnan sustegnidas er da la conferenza dals directurs chantunals d'energia (CDEn) sco puncts centrals per la revisiun parziala da la lescha federala davart l'utilisaziun da las forzas d'aua. La regenza grischuna interpretescha quai sco in ulteriur cler signal da vart dals chantuns al cussegl federal. Ina concordanza cun la regenza datti er tar las posiziuns principalas da la cuminanza d'interess da las vischnancas concessiunaras grischunas (CIVC). Ultra da quai han refusà cleramain tant il cussegl grond en l'ultima sessiun d'avust sco er numerusas vischnancas la proposta centrala dal cussegl federal. La regenza pretenda dal cussegl federal da resguardar – tar l'elavuraziun dal sboz da la missiva – questa clera vusch dal Grischun sco chantun impurtant da forza idraulica per la realisaziun da la strategia d'energia 2050. En collavuraziun cun ils chantuns da muntogna vegn ella a persequitar vinavant la fatschenta en moda attenta ed activa.


Agiuntas:
- consultaziun da la regenza dals 12 d'october 2017
- posiziun da la CRCA dals 28 d'avust 2017


Infurmaziuns:
cusseglier guvernativ dr. Mario Cavigelli, schef dal departament da construcziun, traffic e selvicultura, tel. 081 257 36 01, e-mail Mario.Cavigelli@bvfd.gr.ch


Gremi: regenza
Funtauna: rg chanzlia chantunala dal Grischun
Neuer Artikel